حکوومەتی عێراق بەیاننامەیەک لەبارەی ریفراندۆمی سەربەخۆیی کوردستانەوە بڵاو دەکاتەوە.



رۆژی هەینی 9.6.2017، سەعد حەدیسی، گوتەبێژی حکوومەتی عێراق بەیاننامەکەی بڵاو کردووەتەوە، کە تێیدا جەخت لەسەر چارەسەرکردنی کێشەکانی بەغدا و هەولێر لە رێی دەستووری عێراقییەوە دەکات.



لە بەیاننامەکەدا، حکوومەتی عێراق رایگەیاندووە، پرسی ریفراندۆمی سەربەخۆیی کوردستان پەیوەندیی بە هیچ لایەنێکی دەرەکییەوە نییە، ” پێويسته‌ رێگه‌ نه‌درێت هيچ لايه‌نێكى ده‌ره‌كى ده‌ستتێوه‌ردان بكات“.



سەعد حەدیسی پێیوایە دەستووری عێراق مەرجەعی چارەسەرکردنی هەموو کێشەکانی نێوان هەرێمی کوردستان و عێراقە.



بەپێی دەستووری عێراق، مانەوەی باشووری کوردستان لە عێراق پەیوەستە بە جێبەجێکردنی دەستوور و دابینکردنی مافەکانی گەلی کوردستان لەلایەن حکوومەتی عێراقەوە و هەر کاتێک بەغدا پابەندی رێککەوتنەکان نەبوو لەگەڵ هەولێر، ئەوا گەلی کوردستان مافی جیابوونەوە و سەربەخۆیی هەیە.



لە ساڵی 2013ـەوە و بە بڕیاری نوری مالیکی، سەرۆک وەزیرانی ئەوکاتی عێراق، بەشەبودجەی هەرێمی کوردستان بڕدراوە و حکوومەتی عێراق لە شەڕی دژی رێکخراوی تیرۆریستی داعش، هیچ هاوکارییەکی سەربازیی هێزەکانی پێشمەرگەی کوردستانی نەکرد.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکیدا، داعش دوای هەرەس هپێهێنانی سوپای عێراق، پارێزگاکانی نەینەوا، دیالە، سەڵاحەدین و ئەنباری داگیرکرد.



لە کۆبوونەوەی رۆژی چوارشەممە 7.6.2017ـی مەسعود بارزانی، سەرۆکی هەرێمی کوردستان لەگەڵ نوێنەر و سەرکردەی حزب و لایەنە سیاسییەکانی کوردستان، بڕیاردرا رۆژی 25ـی ئەیلوولی 2017 ریفراندۆمی سەربەخۆیی کوردستان لە هەرێمی کوردستان، کەرکووک و ناوچە کوردستانییەکانی دەرەوەی ئیدارەی هەرێمی کوردستان، ئەنجام بدرێت.

bas news-