به‌هۆى بۆردوومانى داعشه‌وه‌ كه‌ چه‌ند مووشه‌كێكى ئاراسته‌ى دوكانداره‌كانى ناوچه‌ ڕزگاركراوه‌كانى شارى مووسڵ كرد، چوار كه‌س گیانیان له‌ده‌ست دا، هاوكات به‌هۆى بۆردوومانى فڕۆكه‌ جه‌نگییه‌كانى هاوپه‌یمانان بۆ سه‌ر باره‌گاكانى داعش له‌ دیوى ڕاستى شاره‌كه‌، هاوولاتییه‌ك گیانى له‌ده‌ست دا.

سه‌رچاوه‌یه‌كی ئه‌منى ڕای گه‌یاند، داعش چه‌ند مووشه‌كێكى ئاراسته‌ى ناوچه‌ى مووسڵى نوێی له‌ شارى مووسڵ كرد و به‌و هۆیه‌وه‌ 4 هاووڵاتى گیانیان له‌ده‌ست دا و 9ى دیكه‌ش بریندار بوون.

هاوكات، دانیشتووانى دیوى ڕاستى شاره‌كه‌ كه‌ تائێستاش به‌شێكى له‌ ژێر ده‌ستى داعشه‌، ڕای ده‌گه‌یه‌نن، كه‌ فڕۆكه‌ جه‌نگییه‌كان بۆردوومانى باره‌گا و چه‌كدارانى داعشى كردووه‌، به‌ڵام به‌هۆى ئه‌و بۆردوومانانه‌وه‌ ژماره‌یه‌ك هاووڵاتى بوونه‌ قوربانىا.

له‌و بۆردوومانه‌دا هاووڵاتییه‌كى مووسڵى گیانى له‌ده‌ست دا و سێی دیكه‌ش بریندار بوون.







باسنيوز