هێزە عێراقییەکان 10 ئۆتۆمبێلی پڕ لە چەک و تەقەمەنیی رێکخراوی تیرۆریستیی داعش دەتەقێننەوە.



بەپێی بەیاننامەیەکی هێزە عێراقییەکان، کە رۆژی دووشەممە 10.4.2017 بڵاو کراوەتەوە، هێزە عێراقییەکان ئەو 10 ئۆتۆمبێلەی چەکدارانی داعشیان لە لە گوندی حەمرە لە سنووری شارۆچکەی تەلەعفەر تەقاندووەتەوە.



ئۆتۆمبێلەکان، کە چەک و تەقەمەنییان هەڵگرتبوو، بە تۆپبارانی هیزە عێراقییەکان تەقێندراونەتەوە و هەموو چەکدارەکانی نێویشیان کوژراون.



سەرلەبەیانیی رۆژی یەکشەممە 19.2.2017، حەیدەر عەبادی، سەرۆک وەزیران و فەرماندەی گشتیی هێزە چەکدارەکانی عێراق دەست پێکردنی ئۆپەراسیۆنی رزگارکردنەوەی بەری رۆژئاوای مووسڵی راگەیاند.



رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.



هێزەکانی پێشمەرگەی کوردستان لە چەند رۆژی یەکەمی ئۆپەراسیۆنەکەدا، هەموو ناوچە کوردستانییەکانی سنووری پارێزگای نەینەوایان رزگار کردەوە و رۆژی سێشەممە 24/1/2017یش هێزە عێراقییەکان رزگارکردنەوەی تەواوەتیی بەری رۆژهەڵاتی مووسڵ‌یان راگەیاند.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.
bas news _