به‌پێی هه‌واڵێك، كه‌ ماڵپه‌رى "سۆمه‌رییه‌ نیوز" له‌سه‌ر زارى سه‌رچاوه‌یه‌ك بڵاوی كردووه‌ته‌وه‌، ئه‌بو به‌كر به‌غدادى، سه‌رۆكى ڕێكخراوى توندڕه‌وى داعش، داواى له‌ ئه‌ندامانى ڕێكخراوه‌كه‌ى كردووه‌ خۆیان بشارنه‌وه‌ و ڕووبكه‌نه‌ شاخه‌كان.



سه‌رچاوه‌یه‌كی ناوخۆیی له‌ پارێزگاى نه‌ینه‌وا، ڕای ده‌گه‌یه‌نێت :" ئه‌بو به‌كر به‌غدادى، سه‌ركرده‌ى داعش گوتارێكى ئاراسته‌ى چه‌كداران و شوێنكه‌وتووانى خۆى ده‌كات".



ماڵپه‌رى "سۆمه‌رییه‌ نیوز"ى عێراقی بڵاوی كردووه‌ته‌وه‌، كه‌ "به‌غدادى" له‌ گوتاره‌كه‌یدا دانى به‌وه‌دا ناوه‌ له‌ شه‌ڕه‌كانى ئه‌م دواییانه‌ دۆڕاون، بۆیه‌ داوا له‌ چه‌كداران و ئه‌ندامانى ڕێكخراوه‌كه‌ى ده‌كات "خۆیان بشارنه‌وه‌ و ڕووبكه‌نه‌ ناوچه‌ شاخاوییه‌كان".



تا ئێستا به‌ شێوه‌یه‌كی فه‌رمى، میدیاكانى سه‌ر به‌ڕێكخراوى توندڕه‌وى داعش، ڕاستى ئه‌و هه‌واڵه‌یان بڵاو نه‌كردووه‌ته‌وه‌ و ئاماژه‌یان به‌و گوتاره‌ نه‌داوه‌.



هێزه‌ ئه‌منییه‌كانى عێراقیش، له‌ به‌رى ڕاستى شارى مووسڵ له‌ پێشڕه‌ویدا و چه‌ند ناوچه‌یه‌كیان ڕزگار كردووه‌، شه‌ڕیش به‌رده‌وامى هه‌یه‌.
bas news -