ژمارەیەک سەربازی عێراقی هاووڵاتییەکی سنووری پارێزگای نەینەوا بەشێوەیەکی دڕندانە دەکوژن.

ئەو سەربازانە، کە گرتەی ڤیدیۆیی سووکایەتی، ئەشکەنجەدان و کوشتنی هاووڵاتییەکەیان تۆمار کردووە و بڵاو کردووەتەوە، موسڵمانی شیعەمەزهەبن، یەکێکیان دەڵێ ”من خەڵکی نەجەفم“ و هاووڵاتییەکەش عەرەبێکی سوننەمەزهەبی گوندێکی مووسڵە.

سەربازەکان پێش ئەوەی هاووڵاتییەکە بکوژن، بە چەکەکانیان لێی دەدەن و سووکایەتی پێ دەکەن، بەهیچ شێوەیەک رێگای پێ نادەن بەرگریی لە خۆی بکات و لە بەرچاوییەوە گۆڕێک هەڵ دەکەنن و لە ناو گۆڕەکە بە تۆمەتی ئەوەی چەکداری رێکخراوی توندڕەوی داعشە، دەیکوژن.

کەناڵی (جەزیرە) گرتە ڤیدیۆییەکەی بە راپۆرتێک بڵاو کردووەتەوە و لە زاری سەرچاوەکانییەوە رایگەیاندووە، کە ئەو هاووڵاتییە باوکی سێ کچە و جووتیار بوو لە گوندێکی باشووری مووسڵ.

چەندین جار رێکخراوەکانی مافی مرۆڤ سوپا و میلیشیا عێراقییەکان، کە زۆرینەی سەرباز و چەکدارەکانیان لە مەزهەبی شیعە پێکدێن، بە ئەنجامدانی تاوانی جەنگی و ئەشکەنجەدان تۆمەتبار دەکەن و رایدەگەیەنێت، کە هاووڵاتییانی سوننەمەزهەب بەبێ دادگایی کردن و لەسەر شەقامەکان، دەکوژن.

لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەسهێنان و شکستی سوپای عێراق، چەکدارانی داعش زۆربەی ناوچەکانی پارێزگاکانی نەینەوا، سەڵاحەدین، دیالە و ئەنباریان داگیر کرد.







باسنيوز