ئێوارەی ئەمڕۆ دووشەممە بەڕێوەبەرایەتی پۆلیسی هاتوچۆی بەغدا هۆشداری دا شۆفێران لەوەی كە سبەی سێشەممە شەقامەكانی شارەكە ڕووبەڕووی تەنگژەیەكی گەورەی هاتوچۆ دەبنەوە، ئەمەش بەهۆی گرتنی ژمارەیەكی زۆری ڕێگەوبان و پردەكانی شارەكە.

عەمار وەلید بەرپرسی راگەیاندنی هاتوچۆی بەغدا لەمبارەوە گوتی سبەی پردەكانی كۆماری و سەنك و گۆڕەپانی تەحریر و ڕێگەكانی سەر ئەو پردانە دەگیرێن.

هەروەها گوتی شەقامەكانی سەعدون و ئەبونەواس بەرەو پردی كۆماری و دووڕیانی قورتوبە دەگیرێن، لەگەڵ تونێلی زەیتون و دووڕیانی دەرەوەی كەرخ.

ئەگەرچی هاتوچۆی بەغدا هۆكاری گرتنی ڕێگەوبانەكانی ئاشكرا نەكردووە، بەڵام لە چەند رۆژی رابردوودا دۆخی ئەمنی شارەكە بەتەواوی شڵەژاوە و بەر لە دوو ڕۆژیش لە ئەنجامی كەوتنەوەی توندوتیژی لە خۆپێشاندانەكاندا، دەیان كوژراو و بریندار كەوتنەوە و خۆپێشاندەران لە ناوچەی سەوز نزیك بوونەوە، كە دەزگا حكومیەكان و پەرلەمان و ماڵی بەرپرسانی عێراقی لێیە.







باسنيوز