په‌رله‌مانتار مشعان جبوورى، ئه‌ندامى به‌ره‌ى چاكسازى له‌ ئه‌نجوومه‌نى نوێنه‌رانى عێراق، شانازى به‌و پێشكه‌وتن و ئاوه‌دانییه‌ى له‌ پارێزگاكانى هه‌رێمى كوردستاندا به‌دی هاتووه‌ ده‌كات و به‌ عه‌بادى و پارێزگاره‌كانى عێراقیش ڕاده‌گه‌یه‌نێت، كه‌ ناتوانن كێبڕكێ له‌گه‌ڵ هه‌رێمى كوردستاندا بكه‌ن و پارێزگاكانیان په‌ره‌پێبده‌ن و ئه‌گه‌ر توانیان شاره‌كان به‌و شێوه‌یه‌ لێبكه‌ن، ئه‌وكات شعرێكیان به‌ باڵادا بۆ ده‌نووسێت.

مشعان جبوورى، له‌ پێگه‌ى تایبه‌تى خۆى له‌ تۆڕى كۆمه‌لایه‌تی فه‌یسبووك ده‌نووسێت :" ئه‌وه‌ى هاتوچۆى كوردستانى كردووه‌ له‌ پێش 2003 و ئێستاش ده‌یبینێت، تێبینی ئه‌و پێشكه‌وتن و ئاوه‌دانییه‌ گه‌وره‌یه‌ ده‌بینێت، كه‌ چۆن توانیویانه‌ ئه‌و هه‌موو ده‌ستكه‌وتانه‌ به‌ 17% بودجه‌وه‌ به‌ده‌ست بهێنن، له‌ كاتێكدا پارێزگاكانى دیكه‌ى عێراق وه‌ك خۆیان ماونه‌ته‌وه‌، ئه‌گه‌ر خراپتر نه‌بن له‌ پێش 2003 سه‌ربارى ئه‌و هه‌موو بودجه‌ زۆره‌".

ئه‌و په‌رله‌مانتاره‌، گوتیشی :" په‌یمان به‌ سه‌رۆك وه‌زیران یان هه‌ر پارێزگارێك ده‌ده‌م ئه‌گه‌ر بتوانن پارێزگاكان یان هه‌ر شارێكى دیكه‌ وه‌كو هه‌ولێر و سلێمانى و دهۆك لێبكه‌ن، ئه‌و كاتبه‌ڵێن بێت شعرێكى جوانیان به‌ باڵادا بنووسم".

جبوورى به‌ شانازییه‌وه‌، گوتیشی :" شانازى به‌ شاره‌كانى هه‌رێمه‌وه‌ ده‌كه‌م بۆ ئه‌و ده‌ستكه‌وت وئاوادانى و پێشكه‌وتنه‌ى به‌دی هاتووه‌، پێش ئه‌وه‌ش خۆشه‌ویستیم بۆ عێراق، مه‌به‌ستمه‌".

payamner -