ئێواره‌ى ئه‌مڕۆ له‌ نزیك شارى كه‌ركووك، ته‌رمى "عه‌بدولقادر قه‌یسی" پارێزه‌روه‌كه‌ى كه‌یسی تاریق هاشمى دۆزرایه‌وه‌ كه‌ ماوه‌ى چوار ڕۆژه‌ له‌ به‌غدا ڕفێنراوه‌.



ئه‌یاد كاكه‌یی، سه‌رۆكى لقى هه‌ولێری سه‌ندیكاى پارێزه‌رانى كوردستان له‌ لێدوانێكیدا به‌ (باسنیوز)ى ڕاگه‌یاندن :"د. عه‌بدولقادر قه‌یسی، یه‌كێك له‌ گه‌وره‌ نووسه‌ر و ڕۆژنامه‌نووس و پارێزه‌رانى عیراق كه‌ دۆستایه‌تییه‌كى به‌هێزى له‌گه‌ڵ كوردستان هه‌بوو، دانیشتووى شارى هه‌ولێره‌ و به‌مه‌به‌ستى به‌رێكردنى جه‌ژنى سه‌ری ساڵ چووه‌ته‌ به‌غدا و له‌وێ چوار ڕۆژ پێش ئێستا له‌لایه‌ن چه‌ند چه‌كدارێكى نه‌ناسراوه‌وه‌ ڕفێنرا، به‌ڵام ئه‌مڕۆ (پێنجشه‌مه‌ 5ى1ى2017) كاتژمێری 6ى ئێواره‌ ته‌رمه‌كه‌ى له‌ نزیك شارى كه‌ركووك دۆزراوه‌ته‌وه‌".



گوتیشی :" ئه‌و پارێزه‌ره‌ هه‌م ئه‌ندامى سه‌ندیكاى پارێزه‌رانى كوردستان و ئه‌ندامى سه‌ندیكاى ڕۆژنامه‌نووسانى كوردستانیش بوو، دواى ئه‌وه‌ى كه‌ دۆسیه‌ى به‌رگریكردن له‌ تاریق هاشمى جێگیری سه‌رۆك كۆمارى پێشووى عیراق ده‌گرێته‌ ئه‌ستۆ، هه‌ره‌شه‌ى لێده‌كرێت و به‌و هۆیه‌شه‌وه‌ دێته‌ شارى هه‌ولێر نیشته‌جێ ده‌بێت، به‌ڵام به‌هۆی ئه‌و داوه‌ته‌ى بۆی هاتبوو له‌ جه‌ژنى سه‌ری ساڵدا ده‌چێته‌وه‌ به‌غدا و دواتر ده‌فڕێنرێت.



سه‌رۆكى لقى هه‌ولێری پارێزه‌رانى كوردستان، نه‌یشارده‌وه‌ كه‌ گومانیان هه‌یه‌ ئه‌و ده‌سته‌ى كه‌ دژایه‌تى تاریق هاشمى ده‌كرد هه‌مان ئه‌و ده‌سته‌ش له‌ پشت تیرۆركردنى د. عه‌بدولقادر قه‌یسی_یه‌وه‌ بن.



له‌ ساڵى 2010 وه‌ له‌سه‌رده‌مى نوورى مالیكى تۆمه‌تى تیرۆر درایه‌ پاڵ تارق هاشمى، كه‌ ئه‌وكات جێگرى سه‌رۆك كۆمارى عێراق بوو، بۆیه‌ ئه‌ویش به‌ناچارى عێراقی به‌جێهێشت و ڕووی كرده‌ وڵاتى توركیا، دواتر دادگا به‌شێوه‌ى ئاماده‌ نه‌بوو، سزاى له‌سێداره‌دانى بۆ ده‌ركرد.

bas news-