هێزێکی هاوبەشی سێ وڵاتی ئەوروپا دەگاتە سنووری شاری مووسڵ بۆ بەشداریکردن لە ئۆپەراسیۆنی رزگارکردنەوەی مووسڵ.



بەپێی هەواڵێکی ئاژانسی (ئەنادۆڵ)، کە زانیارییەکانی لە ئەفسەرێکی سوپای عێراقییەوە وەری گرتووە، هێزەکە لە 30 هەمەر و هامڤی، 20 ئۆتۆمبێلی هەڵگرتنەوەی مین، 10 تانکی جۆری ئەبرامز و سێ ئۆتۆمبلی هەڵگری رادار پێکهاتووە.



هێزەکە لە سوپای وڵاتانی ئەمریکا پێکهاتووە، جگە لە بەشداریکردنی 50 نیشانەشکێن (قەناسبەدەست)ی بەریتانی و فەرەنسی و لە ناوچەی شەلالاتی مووسڵ جێگیر دەکرێن.



خەلیل عەباس ساعدی گوتیشی: "بە ئامانجی پێکانی چەکدارانی داعش، ٥٠ قەناسبەدەستی بەریتانی و فەڕەنسی بە یاوەری ھێزەکەی ئەمریکا گەیشتنە ناوچەی شەلالات".



ئەو هێزە هاوبەشە ئەوروپای-ئەمریکییە هاوکاریی هێزە عێراقییەکان لە رزگارکردنەوەی شاری مووسڵ دەکەن، کە زیاتر لە دوو ساڵە لەلایەن رێکخراوی توندڕەوی داعشەوە داگیر کراوە.



لە رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.







باسنیوز