سەرۆک وەزیرانی عێراق بە هەلیکۆپتەرێکی سەربازیی ئۆپەراسیۆنی رزگارکردنەوەی نەینەوا بەسەر دەکاتەوە.

هەروەک لە پەیجی تایبەتیی نووسینگەی راگەیاندنی سەرۆک وەزیرانی عێراقدا بڵاو کراوەتەوە، رۆژی دووشەممە 12ـی کانوونی یەکەمی 2016، حەیدەر عەبادی، سەرۆک وەزیران و فەرماندەی گشتیی هێزە چەکدارەکانی عێراق چووەتە یەکەکانی فەرماندەیی ئۆپەراسیۆنی رزگارکردنەوەی نەینەوا (هاتین ئەی نەینەوا) لە دەوروبەری شاری مووسڵ.

حەیدەر عەبادی، کە جلی سەربازیی تایبەتی پۆشیوە، لەگەڵ فەرماندە سەربازییەکان کۆ دەبێتەوە و تاوتوێی دوایین پێشهات و پەرەسەندنەکانی رزگارکردنەوەی مووسڵ دەکات.

لە رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.

لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.












باسنيوز