پەرلەمانتارێكی دەوڵەتی یاسا ڕایگەیاند كە لیستەكەیان سوورە لەسەر ئەوەی نووری مالیكی بۆ سێیەم جار كاندید بكرێت بۆ پۆستی سەرۆك وەزیرانی عێراق.

محەمەد سەيهود ئەندامی ئەنجومەنی نوێنەرانی عێراق لە لیستی دەوڵەتی یاسا بەئاژانسی هەواڵی پەیامنێری ڕاگەیاند: ئێمە وەكو لیستی دەوڵەتی یاسا سوورین لەسەر كاندید كردنی نوری مالیكی بۆ جاری سێیەم بۆ پۆستی سەرۆك وەزیرانی عێراق چونكە مالیكی تاكە كەسە بتوانێت بەشێوەیەكی باش و گونجاو بۆ هاوڵاتیان كار بكات لەم كات و ساتەدا و هیچ كەسێك نیە كە بگات بەئاستی رۆشنبیری و فكری و سیاسی مالیكی.

وتیشی" لیستی دەوڵەتی یاسا كار دەكات بۆ پێك هێنانی دەوڵەتیكی بنكە فراوان و پێك هێنانی حكومەتێك كە سەرجەم نەتەوەكان تێدا بەشداری بكەن و چەند كەسانێك هەن كار دەكەن بۆ تێك دانی ڕەوشی ئەمنی و سیاسی عێراق و سەرۆك وەزیرانی عێراق تۆمەتبار دەكەن بۆ ئەوەی لەهەڵبژاردندا سەركوتوو نەبێت و بۆ جاری سێیەم نەكرێت بەسەرۆك وەزیران و ئەمەش كارێكی ناحەزانەیە چونكە عێراق وڵاتێكی دیموكراسی خوازە و بەهەڵبژاردن دەتوانرێت ئەو كەسە دیاری بكرێت كە دەبێت بەسەرۆك وەزیران و نابێت بەشەڕ و ئاژاوە كێشەكان چارەسەر بكرێت.

جێگەی باسە: لیستی دەوڵەتی یاسا بۆ جاری سێیەم سوورن لەسەر كاندید كردنی نووری مالیكی بۆ پۆستی سەرۆك وەزیرانی عێراق وبەكەسێكی شایستەی دەزانن.