شه‌ڕو پێكدادانی قورس له‌نێوان سوپای عیراق و چه‌كداره‌كان له‌باشوری خۆرهه‌ڵاتی شاری فه‌لوجه‌ ده‌ستیپێكرد، دوای ته‌واو بوونی ئه‌و 72 كاتژمێره‌ی سوپا دابویه‌ چه‌كداره‌كان تا خۆیان بده‌ن به‌ده‌سته‌وه‌.

سه‌ره‌تا ئاگری شه‌ڕ له‌نزیك گوندی ئه‌بو حاتم له‌سه‌ر رێی گشتیی عامریه‌ی فه‌لوجه‌ هه‌ڵگیرسا و پێده‌چێت ئۆپه‌راسیۆنه‌ سه‌ربازییه‌كه‌ی سوپا به‌رده‌وام بێت تا به‌ته‌واوی ناوچه‌كه‌ له‌و چه‌كدارانه‌ پاكده‌كرێنه‌وه‌.

پێشتر عه‌شیره‌ته‌كانی شاری فه‌لوجه‌ هۆشداریی ئه‌وه‌یان دایه‌ سوپا كه‌ هه‌وڵی هاتنه‌ ناوه‌وه‌ نه‌دات بۆ شاره‌كه‌، كاتژمێر 6 ئێواره‌ی دوێنێ دووشه‌ممه‌ ئه‌و واده‌یه‌ سوپا دابویه‌ چه‌كداره‌كان تا شاره‌كه‌ چۆڵبكه‌ن یاخۆیان بده‌ن به‌ده‌سته‌وه‌ كۆتای هات.

هێزه‌كانی پۆلیس و سوپا سه‌رجه‌م ئه‌و رێیانه‌یان داخست له‌ نێوان ره‌مادی و فه‌لوجه‌ و ده‌ستیانكرد به‌دانانی خاڵی پشكنین و گرتنه‌به‌ری رێوشوێنی ئه‌منی توند.

محه‌مه‌د عه‌سكه‌ری، راوێژكاری راگه‌یاندنی وزاره‌تی به‌رگری عیراق، رایگه‌یاند،" گرتنه‌به‌ر رێوشێنی ئه‌منیی توندوتۆڵ و ده‌ستكردن به‌چاودێریی كردنی جموجوڵ له‌سه‌ر پرد و ده‌روازه‌ و ده‌شته‌ بیابانه‌كانی سه‌رجه‌م قه‌زاو ناحیه‌كانی پارێزگای ئه‌نبار ده‌ستیان پێكردووه‌، هه‌روه‌ك مه‌فره‌زه‌كانی پۆلیس به‌رۆژا و به‌پشتیوانیی عه‌شیره‌ته‌كان ئه‌ركی چاودێریی كردنی ناوچه‌ ئاویه‌كانی پارێزگاكه‌یان له‌ئه‌ستۆیه‌.

چه‌كداره‌كانی سه‌ر به‌ده‌وڵه‌تی ئیسلامی عیراق و شام ناسراو به‌ ( داعش) ماوه‌یه‌كه‌ كۆنترۆڵی چه‌ند ناوچه‌یه‌كی فه‌لوجه‌یان كردووه‌، هێزه‌كانی سوپا و پۆلیسی عیراق بۆ مه‌به‌ستی سه‌ندنه‌وه‌ی ئه‌و ناوچانه‌ و راوه‌دوونانی چه‌كداره‌ توندڕه‌وه‌كان به‌پشتیوانی چه‌كداری عه‌شیره‌ته‌كان هه‌ڵمه‌تێكی كێوماڵكردنیان ده‌ستپێكرد.









خه‌ندان