ئەمرۆ چەندین كردەوەی تیرۆریستی لەنزیك ناوچەی سەوزی بەغدا ڕووی داوە هەرچەندە ئەو ناوچەیە بەتەواوەتی لەژێر كۆنترۆڵی لیوای بەغدای سوپای عێراقیە كە یەكێكە لەلیوا گرنگەكانی سوپای عێراق وئەركی كۆنترۆڵ كردنی بارودۆخی ناوچەی سەوز لەئەستۆیانە.


سەرچاوەیەكی ئەمنی كە نەیویست ناوی خۆی ئاشكرا بكات بەئاژانسی هەواڵی پەیامنێری ڕاگەیاند : ئەمرۆ بەهۆی تەقینەوەی ئۆتۆمبێلێكی مین رێژكراو لەنزیك وەزارەتی دەرەوەی عێراق كە نزیك ناوچەی سەوزی بەغدایە 8 هاوڵاتی بریندار بوون وئەو ئۆتۆمبێلە لەیەكێك لەپاركەكانی ڕاوەستانی ئۆتۆمبێل دانرابوو .

هەر هەمان سەرچاوە ڕایگەیاند: لەنزیك ناوچەی سەوزی بەغدا لە ناوچەی كەرادە مەریەم كەسێكی خۆ كوژی لەنێو چێشخانەیەك خۆی تەقاندەوە كە تێدا هاوڵاتیەك كوژراو پێنجی دیكەش بریندار بوون .

دواتر لەلایەن سوپای عێراقیەوە بریندارەكان ڕەوانەی نەخۆشخانەی فەریاكەوتنی بەغدا كران وكوژراوەكەش بۆ دادوەری پزیشكی بەغدا ڕەوان كرا.

جێگای باسە: لەدوێنێوە ناوچەی سەوزی بەغدا كردەوەی تیرۆریستی تێدا ئەنجام دەدرێت كە دوو موشەك لەشوێنێكی نەزانراو ڕەوانەی ناوچەی سەوز كرا بەڵام سەرچاوەكانی ئەمنی هیچ لێدوانێكیان لەو بارەیەوە نەدا وڕێژەی كوژراو و بریندارەكانیش ئاشكرا نەكرا ولەدوێنێوە بارودۆخی ئەمنی بەغدا زۆر نا لەبارە وبەدەیان خاڵی پشكنین لەنزیك ناوچەی سەوز دانراوە.