لە ماوەی ڕابردوو لەئەنجومەنی وەزیرانی عێراق بێ دەنگی کورد، پرۆژە یاسای بودجەی عێراق پەسەند کراو ڕەوانەی ئەنجومەنی نوێنەران کرا، لەوێش بەهۆی ناڕەزایی کورد لە بودجەکە و نەبوونی نیسابی یاسایی گفتوگۆ لەسەر پڕۆژەکە دواخرا، ڕاوێژکارێکی پێشووی نوری مالکیش ڕایدەگەیەنێت هیچ ساڵێک حکومەتی عێراق لەسەر بودجە بەخۆشی لەگەڵ هەرێمدا ڕێک نەکەوتووە.



ڕاوێژکاری پێشووی نوری مالکی بۆ کاروباری هەرێمی کوردستان،عادل بەرواری، لەلێدوانێکی تایبەت بۆئاژانس وڕادیۆی پەیامنێر گوتی:" لەسەرەتاشدا لایەنە عەرەبەکان لەگەڵ ئەوەدا نەبوون ڕێژەی لە سەدا حەڤدەی بودجەی عێراق بۆ هەرێمی کوردستان تەرخان بکرێت".



گوتی:"هیچ ساڵێک لەکاتی گفتوگۆکردن لەسەر پڕۆژە یاسای بودجەدا، حکومەتی عێراق بەخۆشی و بە برایانە لەگەڵ هەرێمی کوردستاندا مامەڵەی نەکردووە".



ڕاشیگەیاند: "کێشەی هەناردەی نەوت لەلایەن هەرێمەوە بۆ تورکیاو ئەوروپا یەکێکە لە کێشە سەرەکیەکانی نێوان هەرێم و بەغدا، چونکە بەغداد دەیەوێت لە دەسەڵاتی خۆیدا بێت".