سه‌رچاوه‌یه‌ك له‌ پۆلیسی پارێزگای ئه‌نبار رایگه‌یاند كه‌ هێزێكی ئه‌منی ئه‌حمه‌د عه‌لوانی ئه‌ندامی ئیئتیلافی عێراقییه‌یان ده‌ستگیركرد دوای كوژران و بریندار بوونی پازده‌ كه‌س له‌ پاسه‌وانان و خانه‌واده‌كه‌ی له‌ناوه‌راستی شاری رومادی ، دوای ئه‌م رووداوه‌ش قه‌ده‌غه‌كردنی هاتوچۆ له‌م شاره‌ راگه‌یه‌ندرا .

سه‌رچاوه‌كه‌ روونیكرده‌وه‌ كه‌ سه‌ر له‌ به‌یانی ئه‌مڕۆ دوای ئه‌نجامدانی پرۆسه‌یه‌كی گه‌ران و پشكنین له‌لایه‌ن هێزێكی سوپا له‌ گه‌ڵ پاسه‌وانانی ئه‌حمه‌د عه‌لوانی له‌ناو ماڵه‌كه‌ی له‌ناوچه‌ی ئه‌لبو عه‌لوان ناوه‌راستی شاری رومادی رووبه‌رووی یه‌كتر بوونه‌وه‌ و پێكیاندادا له‌ ئاكامدا پێنج له‌ پاسه‌وانانی و برای كوژران و ده‌ی دیكه‌ بریندار بوون كه‌ له‌نێو برینداراندا منداڵیشی تێدا بووه‌ .

دواتر هێزه‌ ئه‌منییه‌كه‌ ئه‌حمه‌د عه‌لوانییان بۆ شوێنێكی نادیار گواستۆته‌وه‌ . دواتر به‌پێی سه‌رچاوه‌كانی هه‌واڵ ده‌زگا ئه‌منییه‌كان له‌ رومادی قه‌ده‌غه‌كردنی هاتوچۆیان راگه‌یاندووه‌ ، بڕیاریشه‌ هۆزه‌كانی ئه‌م پارێزگایه‌ كۆبوونه‌وه‌یه‌كی به‌ په‌له‌ ئه‌نجام بده‌ن به‌مه‌به‌ستی تاوتۆیكردنی ئه‌م رووداوه‌ .