17 حوزه‌یران / یۆنیۆ (گوڵان میدیا)- عەلی شەلا، پەرلەمانتاری عێراق لەسەر لیستی دەوڵەتی یاسا لە لێدوانێكدا بە گوڵانی راگەیاند: دەوڵەتی عیراق بەرەو چەسپان و گەشەسەندن هەنگاودەنێت ئەویش بە هەماهەنگی و هاوكاریی دڵسۆزانی عیراقی تازە،ئەوەی لە هەولێر هاتە ئاراوەو بە سازكردنی كۆبوونەوەی ئەنجومەنی وەزیرانی عیراقی فیدرال زۆر بەڵگەمان بۆ روون دەكاتەوە نەك بە تەنیا ئاسایی بوونەوەی پەیوەندییەكانی هەردوو بەڕێزان مالكی و بارزانی بەڵكو پەیامێك بوو بۆ هەموو لایەك كە سەلماندی ئەم كۆبوونەوەیەی ئەنجومەنی وەزیران كە لە هەولێر بەسترا جۆرە دڵنیاییەكی بە هەموو عیراقیەكان بەخشی كە ناكرێ ئەم پەیوەندییانەی نێوان بەغداو هەولێر هەر بەو جۆرە بمێنێتەوە بەڵكو هەر ناكۆكی و گرژییەك هەبێت بە لێكگەیشتن و رێكەوتن چارەسەر دەكرێت.

سەبارەت بە سوریا پەرلەمانتارەكەی لیستی مالیكی گوتی: من پێموایە ئەو ترسەی كە لەسەر رەوشی عیراق هەبوو رەوییەوە و تەنیا یەك دوو هەفتەی سەرەتا تۆزێك مەترسی ئەمنی هاتەئاراوەو ئێستا عیراقیش ئەو قۆناغەی تێپەڕاند و لە گۆڕانكارییەكانی ئەو دۆخە بەدوورە و لە بەرژەوندیی عیراق شكایەوە،تەنانەت لە رووی ئیقلیمیشەوە زۆر كەس گرەویان لەسەر ئەوە دەكرد بە دەستتێوەردان لە بارودۆخی سوریا كە خۆیان وا دادەنا ئەوان هاوبەشی خوێنی سوریان و دەتوانن داكۆكی لێ بكەن ئەم گرەوو نیازە سەری نەگرت و عیراقیش سەلماندی كە دوورەپەرێزەو بە هیچ شێوەیەك نابێتە لایەنێكی قەیرانی ئەو وڵاتە،بۆیە دەتوانم بڵێم كە عیراق توانی زۆر دانایانە رەفتار بكات و چاو لە وڵاتانی دیكە نەكات و گوێ بە قسەو پیلانەكانی دوژمنانی ناوچەكە نەدات و بەر لە هەموو شتێك هەوڵی ئەوە بدات خۆی رێك بخاتەوەو كێشەو گرفتەكانی ناوخۆی چارەسەر بكات و ئەو لایەن و پێكهاتانەی ئێستای حوكم زیاتر لە یەكدی نزیك ببنەوەو بۆ بەرژەوەندیی باڵای وڵات دژایەتی و ناكۆكییەكانیان بەلاوە بنێن.