مالیکی لە میانەی دیمانەیەکی کەناڵی ئاسمانی عێراقییە، باسی لەوەکردبوو شتێک بۆ کورد بەناوی مافی چارەی خۆنووسین له‌ ئارادا نییه‌، لەبەرامبەر ئه‌م لێدوانه‌ پەرلەمانتارێکی هاوپەیمانی کوردستانی رایدەگەیەنێت مالیکی و هیچ کەسێک بەتەنها مافی ئەوەی نییە لەجیاتی گەل بڕیار بدات و مافی چارەی خۆنوسینی لێزەوتبکات.

ئەندامی ئەنجومەنی نوێنەرانی عێراقی سه‌ر به‌هاوپەیمانی کوردستانی دکتۆرە ئەشواق جاف بەئاژانسی هه‌واڵ و رادیۆی پەیامنێری راگەیاند:\"مافی چارەی خۆنوسین بەدەست هیچ کەسێک نییە، تەنها و تەنها گەل خۆی بڕیاری لێدەدات، بۆیە هیچ کەسێک بەتەنها ناتوانێت مافی چارەی خۆنووسین لەگەلی کورد زەوتبکات.\""

گووتیشی:\""پێویستە کاتێک سەرکردە سیاسییەکان لێدوان دەدەن بەباشی بیر لەو لێدوانانە بکەنەوە کە چی دەڵێن و دەرئەنجامەکانی چی دەبێت.\""

جاف ئه‌وه‌شی روونكرده‌وه‌:\""سەرۆکی هەرێمی کوردستان هەموو کاتێک دەڵێت من دەگەڕێمەوە بۆڕای گەلەکەم و هەر ئەوانیش بڕیار لەچارەنووسی خۆیان دەدەن، بۆیە پێویستە نوری مالیکیش بەهەمان شێوە ئەو هەڵبژاردنە بداتە گەلی کورد.\"""