28ی‌ ئازار/ مارس 2013 (گوڵان میدیا)- كاسرین ئاشتۆن لێپرسراوی كاروباری دەرەوەو ئاسایشی یەكێتیی ئەوروپا لە بەیاننامەیەكدا نیگەرانی خۆی لە بەرامبەر ژمارەی حاڵەتەكانی لە سێدارەدان كە لە عیراق ئەنجامدراون.

ناوبراو لە بەیاننامەكەدا ئاماژەی بەوەداوە كە یەكێتیی ئەوروپا دەزانێت كە ئەو كەسەی حوكمدراوە بە سزای لە سێدارەدان تاوانێكی گەورەی ئەنجامداوە، بەڵام پێشمانوایە كە لە سێدارەدان نابێتە رێگرێگ بۆ نەهێشتن و بنڕكردنی تاوان.

لە بەیاننامەكەدا ئاشتۆن ئاماژەی بەوەشكردووە كە لە ساڵی 2012 دا 123 حاڵەتی لە سێدارەدان لە عیراقدا ئەنجامدراوە، ئەوەش تووشی نیگەرانییەكی زۆری كردوون، هاوكات رایدەگەیەنێت كە جێی خۆشحاڵییە لە سەرەتای ئەمساڵەوە تائێستا هیچ حاڵەتێكی لە سێدارەدان لەو وڵاتەدا ئەنجامنەدراوە، بەڵام بڕیاری تێهەڵچوونەوە بە ئەنجامدانی لە سێدارەدان كە ئێستا لەلایەن دەسەڵاتدارانی عیراقەوە گفتوگۆی لەبارەوە دەكرێت، مایەی نیگەرانییەكی زۆرە لەكاتێكدا كە پێشتر بڕیاریاندابوو چاوپێخشانەوە بكەن بە دۆسیەی بەندكراواندا، هەروەها دەسەڵاتدارانی عیراق هەڵوێستی یەكێتی ئەوروپا دەزانن لەبارەی پرسی لە سێدارەدان و دەزانن كە ئەو یەكێتییە پێیوایە ئەو حاڵەتە بە پێشلێكردنی مافی مرۆڤ لە قەڵەمدەدرێت.