27ی‌ ئازار/ مارس 2013 (گوڵان میدیا)- جێگری سەرۆکی ئەنجوومەنی نوێنەرانی عێراق رایدەگەینێت , بەردەوام بوونی گفتوگۆی نێوان عێراق و رووسیا بۆ تەواوکردنی گرێبەستی کڕینی چەک, بەھەدەردانی سامانی میللەتە و پێویستیشە ئەم پارەیە لە بوارێکی دیکە سەرف بکرێت.

لەراگەیندراوێکدا کە نووسینگەی عارف تەیفور جێگری سەرۆکی ئەنجوومەنی نوێنەرانی عێراق بڵاویکردۆتەوە تێیدا عارف تەیفور دەڵێت بەردەوام بوون لەسەر گرێبەستی چەکی نێوان عێراق و رووسیا ھەنگاوە بۆ گەندەڵی زیاتر لە وڵات بەتایبەت دوای ئەوەی ئەنجوومەنی نوێنەران ئەم گرێبەستەی ئاڕاستەی دادگاکانی عێراق کرد و لێژنەیەکی لێکۆڵینەوە پێک ھات و دەستی کرد بە لێکۆڵینەوە لەو کەسانەی دەستیان ھەبووە لەو گرێبەستە و بەگەندەڵی تۆمەتبار کراون.
ھەروەھا تەیفور سەرسوڕمانی خۆی نیشاندا لەسەر مکوڕ بوونی حکومەتی عێراقی لەسەر تەواوکرنی ئەم گرێبەستە گوماناوییە و پێیوایە ئەم گرێبەستە بەمەبەستی سیاسی بووە و ئامانج لێی پشتیوانی کردنی رژێمەکەی بەشار ئەسەدە.
نووسینگەی راگەیاندنی جێگری سەرۆکی ئەنجوومەنی نوێنەرانی عێراق
٢٧/ ٣/ ٢٠١٣