2ی‌ كانوونی‌ دووه‌م/ یه‌نایه‌ر (گوڵان میدیا)- سه‌رچاوه‌یه‌كی‌ ئاگادار له‌ئه‌نجومه‌نی‌ نوێنه‌رانی‌ عێراق رایگه‌یاند، له‌‌ ساڵی‌ (2012)دا پارله‌مانتارانی‌ عێراق پانزه‌ موچه‌و پاداشتیان له‌بودجه‌ی‌ ده‌وڵه‌ت وه‌رگرتووه‌.

به‌وته‌ی‌ ئه‌و سه‌رچاوه‌یه‌، هه‌ر (325) پارله‌مانتاره‌كه‌ی‌ عێراق، به‌ر له‌مانگی‌ ره‌مه‌زان هه‌ریه‌كه‌و موچه‌یه‌كی‌ زیاده‌یان وه‌رگرتووه‌و پاشان (500) هه‌زار دیناریان وه‌كو پاداشت پێدراوه‌. له‌كۆتایی‌ ئه‌مساڵیشدا جارێكیتر موچه‌یه‌كی‌ زیاده‌یان وه‌رگرتووه‌، واته‌ كۆی‌ گشتی‌ له‌مساڵدا پانزه‌ موچه‌و پاداشتیان وه‌رگرتووه‌.

سه‌رچاوه‌كه‌، كه‌ نه‌یویست ناوی‌ ئاشكرا بكرێت، رونیكرده‌وه‌ ئه‌نجومه‌نی‌ نوێنه‌ران بۆخۆی‌ بڕی‌ پانزه‌ ملیارو (112) ملیۆن‌و (500) هه‌زار دیناری‌ خه‌رجكردوه‌، له‌كاتێكدا كۆی‌ موچه‌و ده‌رماڵه‌ی‌ مانگانه‌ی‌ هه‌ر پارله‌مانتارێك ده‌گاته‌ (23) ملیۆن دینار.