دیالە.. لە ماوەی ئەمساڵدا ١٥٠٠ تیرۆریست دەستگیرکراون و ١٢ تیرۆرستیش کوژراون
لەمبارەیەوە وتەبێژی پۆلیسی دیالە موقەدەم غالب عەتییە تایبەت بە ئاژانسی ھەواڵی پەیامنێری راگەیاند؛ لە ماوەی ساڵی ٢٠١٢ لە لایەن ھێزە ئەمنییەکانەوە لە سنووری پارێزگای دیالە ھەزار و ٥٠٠ تیرۆریست دەستگیرکراون کە بە پێی ماددەی چواری تیرۆر داواکراون و لە نێو دەستگیرکراوەکاندا ژمارەیەکی زۆر بەرپرسی گەورەی سەر بە رێکخراوە تیرۆریستییەکانی تێدابووە.
عەتییە ئاماژەشیدا: ھەر لەمساڵدا لە لایەن ھێزە ئەمنییەکانەوە توانراوە ٩٠ گروپی چەکدار ھەڵبوەشێنرێنەوە کە زۆربەیان سەر بە رێکخراوە تیرۆریستییەکان بوون, ھەر بۆیە ھەڵوەشاندنەوەی ئەو گروپە چەکدارانە و دەستگیرکردنی تیرۆرستان رۆڵێکی باشی ھەبووە لە گەڕاندنەوەی ئارامی بۆ ناوچەکە و کەمبونەوەی رێژەی کردە تیرۆریستییەکان لەسنوورەکەدا.
ئاماژەیدا؛ ھەر لە ٢٠١٢دا، لە لایەن ھێزە ئەمنییەکانەوە ١٢ تیرۆریست کوژراون و دوو تیرۆریستی دیکەش بە برینداری دەستگیرکراون، ئەمەش بەھۆی رووبەرووبونەوەی لەگەڵ ھێزە ئەمنییەکاندا.
وتەبێژی پۆلیسی دیالە روونیشیکردەوە: ٣٥ حاڵەتی ڕفاندنی ھاوڵاتیانیش تۆمار کراوە کە زۆربەیان لە ژن و منداڵ پێکھاتوون و ژمارەیەکیشیان سەرمایەدار و بەڵێندەر بوونە، دواتر لە لایەن ھێزە ئەمنییەکانەوە توانراوە ٣٣ کەس لە رفێنراوان ئازاد بکرێن و رادەستی کەسوکاریان بکرێنەوە، بەڵام تا ئێستا دووکەسیان بێسەروشوێنن.
لە ساڵی ٢٠١٢ ژمارەیەکی زۆر کردەی تیرۆریستی لە سنووری پارێزگاری دیالە ئەنجامدران کە بەھۆیانەوە بە سەدان ھاوڵاتی کوژران و برینداربوون کە ژمارەیەک لە قوربانییەکان ھێزە ئەمنییەکان بوون، دیارترینیشیان تەقینەوەکەی ناوچەی شفتەی باقووبە بوو کە دەیان کوژراو برینداری لێکەوتەوە.
