18ی تشرینی دووه‌م/نۆڤمه‌به‌ر(گوڵان میدیا)- محسن سەعدون ئەندامی پەرلەمانی عێراق لەسەر لیستی ھاوپەیمانی کوردستان، رایگەیاند: پۆڵ بریمەر حاکمی مەدەنی پێشووی ئەمریکا لە عێراق، لەگەڵ ئەوەدا نەبوو حزبی دەعوە بەشداری لە حکومەت دا بکات لە ٢٠٠٤ دا، بەڵام ھەریەک لە سەرۆک کۆمارو سەرۆکی ھەرێم ئەوەیان رەتکردەوە، ئاماژەی بەوەش دا کە، ئەگەر کورد نەبوایە سەرۆکی حکومەت لەو حزبە نەدەبوو.
سەعدون لە لێدوانێکدا بەسۆمەرییە نیوزی راگەیاند: پۆل بریمەر ئەو کات بەھیچ شێوەیەک لەگەڵ بەشداری کردنی حزبی دەعوە نەبوو لە حکومەت دا، بەڵام بەو پێیەی حزبی دەعوە، حزبێکی مێژووییەو پرۆسەی سیاسی بەبێ ئەو ناچێت بەڕێوە، ھەربۆیە ھەریەک لەسەرۆک مام جەلال و سەرۆک بارزانی ئەو بۆچونەیان رەتکردەوە.
سەعدون ئاماژەی بەوەش دا کە، ھاوپەیمانی کوردستانی بەپێکھێنانی ھاوپەیمانییەکی چوار قۆڵی توانی حکومەتی پێشوو لە داڕمان رزگار بکات، ھەروەک ھاوپەیمانی کوردستان نەبوایە سەرۆک وەزیران لە حزبی دەعوە نەدەبوو ئێستا.