24 ئەیلوول/سێپتێمبەر (گوڵان-میدیا) ـ باراك ئۆباما، سەرۆكی ویلایەتە یەكگرتووەكانی ئەمریكا، لە نامەیەكدا داوای لە مەسعود بارزانی، سەرۆكی هەرێمی كوردستان كرد كە جەلال تاڵەبانی، سەرۆك كۆماری عێراق، واز لە پۆستەكەی بهێنێت و ئەیاد عەللاوی جێگەی بگرێتەوە. بەڵام بارزانی ئەو پێشنیازەی رەتكردەوە و ناڕەزایی دەربڕی لەوەی كە ئەمریكا داوای لێدەكات كێشەی نێوان شیعە و سوننە \"لەسەر حیسابی كورد\"" چارەسەر بكات.
ژەنەراڵی خانەنشینكراوی ئەمریكی بێرنارد تراینۆر، لە كتێبێكدا كە چاوەڕێدەكرێت بەم نزیكانە بكەوێتە بازاڕەوە و رۆژنامەی (نیویۆرك تایمز) لە رۆژی 23ی ئەو مانگەدا پوختەیەكی لێ بڵاوكردووەتەوە، باسی وردەكارییەكانی قۆناخی بەر لە كشانەوەی سوپای ئەمریكا لە عێراق دەكات و ئەوە دەگێڕێتەوە كە بیرۆكەی لابردنی تاڵەبانی و دانانی عەللاوی لەلایەن جۆزێف بایدن، جێگری سەرۆكی ئەمریكاوە خراوەتەڕوو. دواتر، ئۆباما بە تەلەفۆن پەیوەندی بە تاڵەبانییەوە كردووەو پێشنیازەكەی پێگەیاندووە، بەڵام تاڵەبانی رەتیكردووەتەوە. لە كۆبوونەوەیەكی گەورە كاربەدەستانی ئەمریكاشدا بایدن دەربارەی پۆستی تاڵەبانی دوای وازهێنانی لە سەرۆكایەتی كۆمار، گوتوویەتی \""با بیكەینە وەزیری دەرەوە\"".

-رووداو"