گوتەبێژی لیستی هاوپەیمانی كوردستان لەئەنجومەنی نوێنەرانی عێراق رایدەگەێنێت ئەمرۆ پێنجشەممە دەنگ لەسەر پێكهاتەی ئەندامانی كۆمسیۆنی باڵای سەربەخۆی هەڵبژاردنەكانی عێراق دەدرێت.

موئەیەد تەیب گوتەبێژی لیستی هاوپەیمانی كوردستان لەئەنجومەنی نوێنەرانی عێراق بە ئاكانیوزی راگەیاندووە، سەرجەم ئامادەكارییەكان بۆ دەنگدان لەسەر ئەندامانی كۆمسیۆنی باڵای سەربەخۆی هەڵبژاردنەكان تەواو بووە و ئەمرۆش لە دانیشتنی ئاسایی پەرلەمانی عێراقدا دەنگی لەسەر دەدرێت و پرسەكە یەكلایی دەكرێتەوە.

گوتیشی، پەرلەمان دەنگ لەسەر ئەوە دەدا كە رێژەی كورسییەكانی ئەو كۆمیسیۆنە وەك خۆی بە 9 كورسی بمێنێتەوە یان ببێ بە 15 كورسی، ئاماژەی دا ئەگەر ژمارەی كورسییەكان بوو بە 15 ئەوا كورد 3 كورسی بەر دەكەوێت و بەپێچەوانەوە هەردوو كورسییەكەی خۆی دەمێنێتەوە.

هەروەهاگوتی، لەسەرەتادا 60 كەس داوای پێشكەش كردبوو بۆ ئەوەی ببێتە ئەندام لە كۆمسیۆنی سەربەخۆی باڵای هەڵبژاردنەكان، دوای پۆڵینكردنیان تەنیا 30 كەس مانەوە كە 5 كەسیان كوردن.

گوتەبێژی لیستی هاوپەیمانی كوردستان لە ئەنجوومەنی نوێنەرانی عێراق گوتیشی، ئەو دەستەیە نوێیەی كە بۆ كۆمسیۆن دیاریی دەكرێن، دووشەممەی داهاتوو لە پەرلەمانی عێراق سوێندی یاسایی دەخۆن