بارستەی ئەحراری سەر بە رەوتی سەدر لە پەرلەمانی عێراق ئەمڕۆ چوارشەم رای گەیاند كە تەنگژەی نێوان هەردوو حكوومەتی بەغدا و هەرێمی كوردستان سەربازی و تەناهی نییە، بگرە بەهۆی كەڵەكەبوونی كێشە سیاسییەكانە و داوای كرد پەلە لە چارەسەركردنیان بكرێ.
ەها ئەعرەجی لە بەیاننامەیەكی بارستەكەدا گوتی، لە كۆبوونەوەی دوێنێی نووری مالیكی سەرۆك وەزیرانی عێراق و سەرانی بارستە سیاسییەكاندا، ئاماژە بۆ تەنگژەی دوایی لە نێوان حكوومەتی فیدراڵ و حكوومەتی هەرێمی كوردستان كرا بەتایبەتی ئەو هێزە سەربازییەی رەوانەی ناوچە سنوورییەكان كرا.

زیاتر گوتی، داوا دەكەین پەلە لە چارەسەركردنی ئەو جۆرە كێشانە بكرێ و ئاماژەی كرد، تەنگژەكە سەربازی و تەناهی نییە، بگرە بەهۆی كەڵەكەبوونی كێشەكانە و پێشتر وریاداریمان لەبارەیانەوە داوە.

ئەعرەجی ئاماژەی بۆ پێویستی چارەسەركردنی تەنگژە سیاسییەكان بەپێی دەستوور و بەبێ دواخستن كرد بۆ ئەوەی دۆخێك روونەدا كە سەربازێكی عەرەب بەرامبەر سەربازێكی كورد بوەستێ و چەك ئاراستەی یەكتر بكەن بەهۆی كێشەی سیاسییەوە.

روونی كردەوە، بۆ ئەوەی دادوەر بین پێویستە گوێبیستی بۆچوونی دەزگا تەناهییەكانی هەرێمی كوردستان بین و ئەوەشمان لە سەرۆكایەتیی ئەنجوومەنی وەزیران دوا كردووە، وێڕای داوای پێویستی سازكردنی كۆبوونەوەیەكی یەكلاكەرەوە لە نێوان سەرۆك وەزیرانی عێراق و سەرۆكی هەرێمی كوردستان بۆ چارەسەركردنی كێشەكان بەپێی دەستوور.

ئەمڕۆ چوارشەم بارستەی یەكگرتووی ئیسلامی لە پەرلەمانی عێراق دەستپێشخەرییەكی بۆ كۆكردنەوەی هەریەك لە مەسعوود بارزانی سەرۆكی هەرێمی كوردستان و وەزیری پێشمەرگەی هەرێم و نووری مالیكی سەرۆك وەزیرانی عێراق و وەزیری بەرگریی عێراق راگەیاند بۆ تاوتوێكردنی پرسی بڵاوكردنەوەی سوپای عێراق لە ناوچە كێشەدارەكاندا.














ئاكانیوز