پاش سەردانی ڕێبەری شیعە (موقتەدا سەدر) بۆ هەرێمی كوردستان و دانیشتنی لەگەڵ سەرۆككومار و سەرۆكی هەرێمی كوردستان و هەروەها سەرۆكی لیستی عێراقییە و سەرۆكی پەرلەمانی كوردستان، بەیاننامەیەكی 9 خاڵییان بڵاو كردەوە كە تێیدا سەرۆكوەزیرانی عێراق ناچار كراوە كە دەبێ لە ماوەی 15 رۆژدا تەواوی خاڵەكان جێبەجێ بكات، كەچی دوای تێپەڕبوونی ئەو ماوەیە هیچ هەنگاوێكی كرداری لە لایەن (مالیكی)ـیەوە نەنراوە. ئەندامێكی ئەنجوومەنی نوێنەرانی عێراقیش، دەڵێت كە (مالیكی) ئیرادەیەكی سیاسیی بۆ چارەكردنی كێشەكان نییە.

ئەندامی ئەنجوومەنی نوێنەران (د. ئەشواق جاف) ڕایگەیاند كە هێزە سیاسییەكانی چاوەڕوانی ئەوە بوون كە (مالیكی) لەو ماوەیەدا شتێك بكات، بەڵام بە پێچەوانەوە زۆر هەنگاوی پێچەوانەی نا بە تایبەت سەردانەكەی ئەم دواییەی بۆ كەركووك و تۆمەتباركردنی كورد لە رێگەی میدیاكانەوە.

ئەو دەڵێت: \"بەداخەوە هەمیشە (مالیكی) وای خۆ نیشان دەدات كە خەمخۆری میللەتی كوردە، بەڵام لە ڕاستیدا ئەو ئیرادەیەكی سیاسیی بۆ چارەكردنی كێشەكان نییە و تا ئێستایش هیچ هەنگاوێكی پۆزەتیڤی نەناوە.\""

گۆڕینی (مالیكی) بە (جەعفەری)
ئەندامی ئەنجوومەنی نوێنەران (د. حەمید باڤی) سەبارەت بە دەنگۆی گۆڕینی (مالیكی) بە (جەعفەری) دەڵێت: \""پێشتر (جەعفەری)ـمان تاقی كردووەتەوە كە لە هەندێك لایەندا زۆر لە (مالیكی) توندتر بووە، بۆیە پێم وایە دانانی (جەعفەری) لە جێی (مالیكی) هیچ لە پرسەكە ناگۆڕێت و ڕەنگە ئەویش لەسەر سیاسەتەكانی (مالیكی) بەردەوام بێت.

(د. ئەشواق جاف)ـیش باس لەوە دەكات كە پێویستە هێزە سیاسییەكان زۆر وریا بن لە دەستنیشانكردنی كەسێكی دیكە بۆ پۆستی سەرۆكوەزیران و دەڵێت: \""دەبێ لە هەموو ڕوویەكەوە ئەو كەسە دیراسە بكرێت كە تا چەند بە جێبەجێكردنی رێككەوتنامەكانەوە پابەند دەبێت، بۆیە دیراسەكردنی پێشوەختە بۆ ئەو كەسەی كە دەبێتە سەرۆكوەزیران، زۆر گرنگە.\""

هەڵبژاردنی پێشوەختە
دەستوور رێگەی داوە كە لە كاتی هەبوونی هەر كێشەیەك لە ناوەوەی وڵاتدا، هێزە سیاسییەكان دەتوانن بڕیار لەسەر ئەنجامدانی هەڵبژاردنی پێشوەختە بدەن و حكوومەتێكی كاتی پێك بهێنن، تا ئەوكاتەی هەڵبژاردنەكە كۆتایی پێ دێت كە چەند جارێك (مالیكی) لە لێدوانەكانیدا ئاماژەی پێ داوە.

گەڕانەوە بۆ ڕای گەل:
سەرۆكی هەرێمی كوردستان (مەسعوود بارزانی) ئەو كاتەی كە لە واشنتۆن بوو، لە كۆنگرەیەكی رۆژنامەوانیدا ئەوەی ڕاگەیاند كە لە كاتی جێبەجێنەكردنی ڕێككەوتنامەی هەولێر و تاكڕۆیی لە دەستەڵاتدا، ئەگەری ئەوە هەیە كە بۆ رای گەل بگەڕێنەوە كە ئەمەیش مافێكی دەستوورییە.

(د. حەمید) پێی وایە كە كاتی ئەوە هاتووە دوای تەواوبوونی 15 رۆژەكە لیستی هاوپەیمانی بڕیارێكی یەكلاكەرەوە بدات، چونكە بەشێكی زۆری لایەنە سیاسییەكانی عێراق لە سیاسەتەكانی (مالیكی) ڕازی نین و هەست بە مەترسیی گەڕانەوە بەرەو دیكتاتۆرییەت دەكەن.

ئەو هەروەها پێی وایە كە ئێستایش پڕۆسەی بەعەرەبكردن بە جۆرێك لە جۆرەكان بەردوامە، چونكە تاوەكوو ئێستایش بەشێك لەو كەسانەی كە لە پڕۆسەی سیاسی عێراقدان، هەر بە هزری كۆن مامەڵە دەكەن.

(د. ئەشواق جاف) باس لەوە دەكات كە ئێستا مەترسییەكی زۆر گەورە لەسەر میللەتی كورد هەیە كە پێویست دەكات هێزە سیاسییەكان و هاووڵاتیان زۆر بە وردی ئاگاداری بن و و ئەو مەترسیانەیشی بە \""پلانی ژەهراوی\"" دژ بە كورد وەسف كرد.

\""مللەتی كورد خۆی بڕیاری ئەوەی داوە كە لە چوارچێوەی عێراقدا بمێنێتەوە بەو پێیەی دەستوور زامنی مافەكانی كورد دەكات، بۆیە لە هەر حاڵێكدا دەستوور مافی كوردی زامن نەكرد، ئەوكات میللەتی كورد خۆی بڕیاری سەربەخۆیی دەدات و (مالیكی)ـیش هەقی ئەوەی نییە بڵێت ئەو مافە، دەستووری نییە. \""(د. ئەشواق) وای گوت.

جێی ئاماژەیە، ئەمڕۆ كۆتایی ئەو وادەیەیە كە بە (مالیكی) دراوە تا كێشەكان چارە بكات و هەر وەكوو سەرچاوەكان باسی لێوە دەكەن، چاوەڕێ دەكرێت گۆڕانكارییەكی جیددی بێتە ئاراوە كە گۆڕینی (مالیكی)ـیش یەكێك لە ئەگەرە هەرە بەهێزەكانە."