ئەمرۆ پێنچشەممە لە یاریگاكانی كوردستان خولی نایابی فاستلینكی كوردستان بۆ تۆپی پێی دەستپێكرد، كە تیاییدا یانە بەشداربووەكان بەسەر دوو كۆمەڵە دابەشكرایە و خولەكەش بەشێوازی خول بە دوو قۆناغ ئەنجام دەدرێت لە هەر كۆمەڵەیەك دوو یانە بۆ قۆناغی دووەم سەردەكەوێت.
كۆمەڵەی یەكەم لە یانەكانی ( زاخۆ، كەركووك، شێروانە، هەندرێن، ئارارات، زێرەڤانی، هەولێر)
كۆمەڵەی دووەم لە یانەكانی ( گارە، برایەتی، پێشمەرگەی هەولێر، نەورۆز، سۆلاڤ، دهۆك) پێكهاتووە.
لە دەستپێكی خولەكە یانەی زاخۆ توانی یەكەم سێ خاڵی خولەكە بە دەستبهێنێت دوای ئەوەی بە ئەنجامی (2-0) گۆڵ لە یانەی كەركووكی بردەوە و لە نێو یاریگەی خۆی یانەی شێروانە دوو خاڵی لە دەستدا، كاتێك یارییەكەی بەرانبەر یانەی هەندرێن بە ئەنجامی گۆڵێك یەكسانبوون.
لە پیرمام یانەی ئارارات میوانداری یانەی زێرەڤانی كرد و یارییەكە بە ئەنجامی (1-1) گۆڵ یەكسانبوون.
وا بڕیارە رۆژی هەینی سێ یاری تر ئەنجام بدرێت بەمشێوەی خوارەوە.
پێشمەرگەی هەولێر - نەورۆز
برایەتی - گارە
سۆلاڤ - دهۆك
یارییەكانیش كاتژمێر 2ی ئێوارە ئەنجام دەدرێت.
رێبین رەمزی