لە ماوەی رابردوودا سەرۆكی لێژنەی ئۆڵۆمپی كوردستان سەڵاح حەسەن خەسرەو بە نهێنی سەردانی جێگری سەرۆكی حكوومەتی هەرێمی كوردستان بەرێز قوباد تاڵەبانی كردووە، بەمەبەستی گفتوگۆكردن لەسەر بابەتی برینی بودجەی لێژنەی ئۆڵۆمپی كوردستان، بە پێی سەرچاوەكان سەرۆكی لێژنەی ئۆڵۆمپی كوردستان داوای پێدانی منحەی چوار مانگی لێژنەی ئۆڵۆمپی كردووە و بەرێزیان پەیمانی داوە بەزووترین كات ئەم داوایە جێبەجێ بكرێت.
بە پێی سەرچاوەیەكی باوەرپێكراو لە نێو لێژنەی ئۆڵۆمپی كوردستان، سەردانی سەرۆكی لێژنەكە بەشێوەیەكی نهێنی بووە و بە بێ ئاگای ئەندامانی مەكتەبی تەنفیزی لێژنەكە بووە و هەروەها جێگرەكانی سەرۆكێش بێ ئاگایی خۆیان لەم بابەتە نیشان داوە، بە پێی هەمان سەرچاوە، ئەندامانی مەكتەبی تەنفیزی لێژنەی ئۆڵۆمپی نیگەرانن لەم كارەی سەرۆكی لێژنەكە و داواكاری روونكردنەوە لەسەر ئەم بابەتە دەكەن، چونكە ناكرێت كارێكی لەم شێوەیە بە تاكە كەسی ئەنجام بدرێت بە بێ گفتوگۆكردن لە كۆبوونەوەی مەكتەبی تەنفیزی و دانانی لێژنەیەك.
جێگەی باسە ئەم سەردانی سەرۆكی لێژنەی ئۆڵۆمپی كوردستان بە بێ ئاگاداری دەزگا راگەیاندنەكان بووە و تا ئێستا زانیاری تەواو لەسەر ئەم بابەتە نییە.
رێبین رەمزی