وا بڕیارە رۆژی سێشەممە لە شاری بەغداد كۆبوونەوەی هونەری پاڵەوانێتی جامی عێراق بۆ تۆپی پێی ئەنجام بدرێت، كە تیاییدا 20 یانە پلەی نایاب و چەند یانەیەكی پلەكانی یەك و دوو و سێ عێراق بەشداری تیاییدا دەكەن، وا بڕیارە لە قۆناغی یەكەم یانەكانی پلەكانی یەك و دوو و سێ دژی یەكتر یاری بكەن، پاشان یانە سەركەوتووەكان دژی یانەكانی خولی نایاب یاری دەكەن.
لەم پاڵەوانێتیەدا هەردوو یانەی (گارە)ی شاری دهۆك و گازی باكوور-ی شاری كەركووك بەشداری دەكەن.
وا بڕیارە هەریەكە لە یانەكانی (حەلە، صحە، صلیخ، جیش، گارە، بەلەد، نجدە، گازی باكوور، تاجی، حسین، محمودیە، خگوگ، شهربان، قزانیە، دیالی، دفاع مدنی، اتصالات، سدە) و هەروەها یانەكانی هەردوو پارێزگای سەڵاحەدین و دیالی بەشداری لەم پاڵەوانێتە بكات.
بە پێی مەرجەكانی ئەم پاڵەوانێتیە یارییەكانی یانەكانی هەردوو پارێزگای دیالی و سەڵاحەدین لە شاری بەغداد ئەنجام دەدرێت و یارییەكان بەشێوەی دەرچوون بە یەك دۆران بەرێوە دەچێت، هەر یانەیەك یارییەكەی لە نێو یاریگەی خۆی بوو، ئەوە پارەی دەستەی ناوبژیوانی یارییەكە دەكەوێتە ئەستۆی ئەم یانەیە و هەر یانەیەك ئەم مەرجە جێبەجێ نەكات ئەوە بە (3-0) بە دۆران هەژمار دەكرێت.
جێگەی باسە لە خولی نایاب یانەكانی هەولێر و دهۆك و زاخۆ بەشداری لەم پاڵەوانێتیە دەكەن.
رێبین رەمزی