دوای ئەوەی یانەی زاخۆ لە سەرەتای وەرزی ئەمساڵدا چەند گرێبەستی لەگەڵ یاریزانەكان مۆركرد، بۆ ئەوەی لە خولی نایابی عێراق ئەنجامی باش بە دەستبهێنن، بەڵام رۆژ لە دوای رۆژ یاریزانەكان یانەكە جێدەهێڵن، لە دواین پێشهاتە یاریزانی پیشەگەری لیبی ئەحمەد زوی یانەكەی جێهێشت بەرەو وڵاتی تونس گەرایەوە، لە لێدوانێكیدا بۆ رۆژنامەكانی تونس ئەحمەد زوی هۆكاری جێهێشتنی یانەی زاخۆ ئاشكرا كرد و گوتی: بریارم دا یانەی زاخۆ جێبهێڵم، چونكە یانەكە چەندین جار پەیمانی پێدام، كە بری 60هەزار دۆلار وەكو پێشەكی گرێبەستەكە بداتە من، بەڵام تا ئێستا ئەم پارەی پێنەداوم، منیش بڕیارم دا بگەرێمەوە تونس و تا بەیانی چاوەڕوانی یانەی زاخۆ دەكەم، كە ئەم برە پارەیەم بۆ بنێرت، بە پێچەوانەوە هیچ پەیوەندیەكم بە یانەی زاخۆ نامینێت.
لە درێژەی قسەكانیدا یاریزان ئەحمەد زاوی گوتی: پێشتر گفتوگۆم لەگەڵ یاریزان مستەفا كەریم كرووە سەبارەت بەم بابەتە، ئەو پێ راگەیاندم، كە یانەكان جێگەی متمانە نینە، بۆیە رەنگە یاری بكەی و پارەت نەداتی و ناتوانی داوا لەسەر یانەكە بەرزبكەیەوە ئەمەش تا رادەیەك شتێكی تازەبوو بۆ من، بۆیە بە پێویستم زانی مافەكانی خۆم دەستبەسەر بكەم ئینجا لەگەڵ یانەكە مەشق بكەم، هەرچەندە یانەی زاخۆ ئێستا لە رۆمانیایە بۆ ئۆردوگای مەشقی، بەڵام من نەچووم بەهۆی نەبوونی ڤیزا.
جێگەی باسە گرێبەستی یاریزانی لیبی ئەحمەد زاوی لەگەڵ یانەی زاخۆ بڕی (120) هەزار دۆلارە و یەكێك یە گۆلكارە بەتواناكانی لیبیا هەژمار دەكرێت.
رێبین رەمزی