سكرتێری یەكێتیی تۆپی پێی كوردستان ئاشكرایكرد، سەرجەم چالاكییەكانیان راگرت، بەهۆی ئەوەی وەزارتی دارایی پارەی یەكێتییەكە نادات، هەرچەندە سەرۆكایەتی حكوومەتی كوردستان رەزامەندیی لەسەرداوە.
سەلام حوسێن رایگەیاند: بڕیارمان دا سەرجەم چالاكی و پاڵەوانیەتییەكانمان رابگرین و هیچ چالاكییەك بەڕێوەنابەین، تاكو وەزارەتی دارایی حكوومەتی كوردستان ئەو بڕەپارەیەمان بۆ خەرج نەكات، كە رەزامەندیی سەرۆكایەتی حكوومەتی لەسەردراوە.
سكرتێری یەكێتیی تۆپی پێی كوردستان روونیكردەوە: بۆ چالاكییەكانی وەرزی 2014-2015 حكوومەتی كوردستان رەزامەندی لەسەر بڕی یەك ملیار دینار دابوو، لەو پارەیەش، تەنیا بڕی 250 ملیۆن دینارمان وەرگرت و بڕەكەی دیكە، كە 750 ملیۆن دینارە، لەلایەن وەزارەتی داراییەوە خەرجنەكراوە و ئامادەش نین ئەو بڕە پارەیەمان پێ بدەن، بۆیە ئێمەش رایدەگەیەنین كە سەرجەم چالاكی و خولەكانمان رادەگرین تاكو ئەو پارەیەمان بۆ خەرج نەكرێت.
یەكێتیی تۆپی پێی كوردستان چالاكترین یەكێتیی وەرزشییە لە كوردستانە و هەموو ساڵێك زۆرترین چالاكی و خول و پاڵەوانیەتیی تۆپی پێ لەسەر ئاستە جیاوازەكان رێكدەخات، جیا لەوەی چەندان خولی پێشخستنی ئاستی راهێنەران و ناوبژیوان ئەنجامدەدات و سەرپەرشتی هەڵبژاردەی كوردستانیش دەكات بۆ بەشداریكردن لە خولەكانی دەرەوە.
ريبين رمزى