دوای ئەوەی لە رۆژانی رابردوو هەواڵێك سەبارەت بە كردنەوەی قوتابخانەیەكی تایبەت بە تۆپی پێی لە شاری بەسرە بەناوی ئەستێرەی پێشووی هەڵبژاردەی عێراق و یانەی هەولێر هاوار مەلا محەمەد، ئەم هەواڵە رەخنەیەكی زۆری ئاراستەی یاریزانی ناوبراو كرد، بۆ ئەم مەبستەش یاریزان هاوار مەلا محەمەد لە لێدوانێكی تایبەتدا بە ماڵپەری گوڵان وەرزش گوتی: لە شاری بەسرە چەند كەسایەتیم پەیوەندیان پێوە كردم و داوای رەزامەندیان لێكردم بۆ ئەوەی قوتابخانەیە لە شاری بەسرە بكرێتەوە بە ناوی هاوار مەلا محەمەد لەسەر ئەركی ئەوان، منیش رەزامەندی خۆم نیشان دا، تەنیا كاری من ئەوە دەبێت پێداویستی جل و بەرگ-یان بۆ بنیرم یاخود لە مانگێك یان چەند مانگێك سەردانیان بكەم.
لە درێژەی قسەكانیدا هاوار مەلا محەمەد گوتی: من حەز دەكەم خزمەتی هەموو كوردستان بكەم، لە رۆژانی رابردوو سەردانی خانەقینم كرد چوومە قوتابخانەیەك و پێداویستی وەرزشیم بۆ بردن و زۆر دڵخۆش بووم و هەروەها لە ئایندیەكی نزیكدا سەردانی هەموو ئەو شوێنانە دەكەم، كە پێویستیان بە یارمەتی من هەیە چ قوتابخانە بێت یاخود تیپی میللیەكان بێت لە هەر چوار شاری كوردستان بە بێ جیاوازی.
لە كۆتایی قسەكانیدا هاوار مەلا محەمەد گوتی: پرۆژیەكی باشم هەیە بۆ خزمەتكردن و پێگەیاندنی یاریزانان لە كوردستان و بە نیازم لە داهاتوودا لە شاری هەولێر گەورەترین قوتابخانەی پیگەیاندنی یاریزانی تۆپی پێی بكەمەوە، ئێستا ئەم پرۆژەیە لەژێر لێكۆلێنەوە دایە بۆ ئەوەی بە باشترین شێوە دروست بكرێت.
رێبین رەمزی