یاریزانی بە ناوبانگی ئیسپانی رائول گۆنزالیس یاریزانی پێشووی یانەی ریال مەدرید گەیشتە رێككەوتن لەگەڵ یانەی نیۆیۆرك كۆزمۆسی ئەمریكی بۆ ئەوەی یاری لەگەڵ یانەی ناوبراو بكات و لە وەرزی داهاتوودا سەرپەرشتی ئەكادیمییەی تازەپێگەیشتووان بكات .
سەرچاوەیەكی نزیك لە یانەی كۆزمۆس رایگەیاند یاریزان رائول لەم هەفتەیەدا بۆند لەگەڵ یانەكەی مۆر دەكات و، لەساڵی داهاتوو سەرپەرشتی ئەكادیمییەی تازەپێگەیشتووان دەكات كەوا بڕیارە یانەكە بیكاتەوە. رائول تەمەنی 37 ساڵە و لە خولی پلە دووی ئەمریكا لەگەڵ یانەی كۆزمۆس یاری دەكات، خولەكەش لەبەهاری 2015 یارییەكانی دەست پێدەكات .
رائول گۆنزالیس لەگەڵ یانەكانی ریال مەدریدی ئیسپانی و شالكەی ئەڵمانی و سەدی قەتەری یاری كردووە، هاندەرانی یانەی ریال مەدرید بە ئەفسانەی یانەی شاهانە دایدەنێن. رائول تا ساڵی 2010 لەگەڵ یانەی ریال مەدرید یاری كردووە و گۆڵكاری مێژوویی ئەم یانەیە بە تۆماركردنی 323 گۆڵ ، لەگەڵ یانەی شاهانە 6 نازناوی خولی ئیسپانیا و 3 نازناوی خولی یانە پاڵەوانەكانی ئەوروپا و دوو نازناوی جامی سوپەری ئیسپانیا و یەك نازناوی جامی سوپەری ئەوروپا و دوو نازناوی جامی ئینتەركۆنتیناكتال بۆ یانەكانی جیهان بەدەست هێناوە. لەگەڵ یانەی شالكە یەك نازناوی جامی ئەڵمانیا و یەك نازناوی جامی سوپەری ئەڵمانیای بەدەست هێناوە، لەگەڵ یانەی سەد یەك نازناوی خولی قەتەر و یەك نازناوی جامی میری قەتەری بەدەست هێناوە .
لەگەڵ هەڵبژاردەی ئیسپانیا 102 یاری نێودەولەتی ئەنجام داوە و 44 گۆڵی تۆمار كردووە كە دووەم گۆڵكاری مێژوویی هەڵبژاردەی لارۆخایە .