هەڵبژاردەی عێراق بەرەو چین بەرێكەوت
لە لێدوانێكی تایبەتدا هەردە رەوف بارام سەرۆكی یەكێتی تۆپی سەرمێزی عێراق راگەیاند بەمەبەستی ئامادەكاری زیاتر بۆ پاڵەوانێتیی وڵاتانی عەرەب كە مانگی داهاتوو لە شاری هەولێر بەڕێوەدەچێت، یەكێتییەكەیان 3 یاریزانی هەڵبژاردەی یەكەم و چەند یاریزانێكی ئاستەكانی تری بەمەبەستی بەشداریكردن لەكامپێكی راهێنان رەوانەی چین كردووە.
هەردە وتیشی هەڵبژاردەكەیان لە لایەن 2 راهێنەری چینیەوە سەرپەرشتی دەكرێت و هیواشی خواست یاریزانەكان بتوانن سوودی پێویست لەكامپەكە وەربگرن.
یاریزانەكانی هەڵبژاردەی یەكەمی عێراق پێكهاتوون لە هەر سێ یاریزانی كورد كاروان و حوسێن عومەر و هەردی عەلائەدین، هاوكات سەیوان جەمالی یاریزانی یانەی وەرزشی سلێمانیش لەسەر خەرجی یانەكەی دەچێتە میسر و دواتر لەوێوە گەشتی چین دەكات.
