یانه‌ی ریال مه‌دریدی ئیسپانی له‌م هاوینه‌ هه‌شت یاریی دۆستانه‌ بۆخۆئاماده‌كردن بۆ وه‌رزی داهاتوو ئه‌نجامده‌دات ، وكارلۆ ئه‌نچیلۆتی راهێنه‌ری تازه‌ی یانه‌كه‌ له‌ویارییانه‌ تیپه‌كه‌ی بۆ وه‌رزی داهاتوو ئاماده‌ ده‌كات.

رۆژنامه‌ی (ماركا)ـی ئیسپانی ئه‌مرۆ شه‌ممه‌ ئاشكرایكرد مێره‌نگی سێ یاریی له‌ ئه‌وڕوپا ئه‌نجامده‌دات ، یارییه‌كانیش به‌رامبه‌ر یانه‌كانی لیۆن و پاریس سانجێرمانی فه‌ڕه‌نسی ده‌بن و هێشتا ناوی تیپی یاریی سییه‌میش ئاشكرا نه‌كراوه‌ .

هه‌روه‌ها یانه‌كه‌ی شاری مه‌درید چوار یاریی له‌ئه‌مه‌ریكا ئه‌نجامده‌دات و ئه‌و یارییانه‌ به‌رامبه‌ر یانه‌كانی لۆس ئه‌نجلۆس گالاكسی ئه‌مه‌ریكی ، یۆڤانتۆسی ئیتالی و ئێڤه‌رتۆنی ئینگلیزی ئه‌نجامده‌دات و تائێستاش ناوی یانه‌ی یاریی چواره‌م ئاشكرانه‌كراوه‌ .

له‌جامی سانتیاگۆ بێرنابیۆ كه‌ ساڵانه‌ یانه‌ی ریال مه‌درید سازی ده‌كات ، شاهانه‌كان مێوانداریی یانه‌ی سه‌ددی قه‌ته‌ڕی ده‌كه‌ن .

له‌ناوه‌ڕاستی مانگی داهاتوو لۆس بلانكۆس به‌بێ یاریزانه‌ به‌شداربووه‌كانی له‌جامی كیشوه‌ره‌كان ده‌ست به‌راهێنانه‌كانی ده‌كات بۆ خۆئاماده‌كردن بۆ وه‌رزی داهاتوو ، كه‌ ئه‌و یاریزانانه‌ به‌شداریی له‌ سێ یاریی دۆستانه‌ی یه‌كه‌می یانه‌كه‌یان ناكه‌ن ، و پاشان په‌یوه‌ندیی به‌شاندی یانه‌كه‌یان له‌ئه‌مه‌ریكا ده‌كه‌ن .