میرۆسلاڤ كلۆزه‌ی هێرشبه‌ری یانه‌ی لازیۆ و هه‌ڵبژارده‌ی ئه‌ڵمانیا، به‌نیازه‌ ژماره‌ پێوانه‌ییه‌كه‌ی گێرد مۆله‌ری هاونیشتیمانی بشكێنێت له‌تۆماركردنی زۆر گۆڵ بۆ هه‌ڵبژارده‌ی وڵاته‌كه‌ی.

كلۆزه‌ تا ئێستا 67 گۆڵی له‌ 126 یارییدا بۆ هه‌ڵبژارده‌ی ئه‌ڵمانیا تۆماركردووه‌ و به‌یه‌ك گۆڵ له‌دوای دێر بۆمبه‌ر (گێرد مۆله‌ر) ه‌وه‌یه‌، ئه‌و ژماره‌ پێوانه‌ییه‌ی مۆله‌ر ماوه‌ی 39 ساڵه‌ وه‌ك خۆی ماوه‌ته‌وه‌ و هیچ یاریزانێك نه‌یتوانیوه‌ تێیپه‌ڕێنێت.

سبه‌ینێ‌ له‌یارییه‌كی دۆستانه‌دا هه‌ردوو هه‌ڵبژارده‌ی ئه‌مریكا و ئه‌ڵمانیا به‌یه‌كده‌گه‌ن، كلۆزه‌ له‌و یارییه‌دا هه‌وڵده‌دات یه‌كه‌مجار ژماره‌كه‌ی مۆله‌ر یه‌كسانبكاته‌وه‌ و دواتر ئه‌و ژماره‌یه‌ تێپه‌ڕێنێت.

پێشتر كلۆزه‌ ژماره‌یه‌كی تری پێوانه‌یی مۆله‌ری یه‌كسانكرده‌وه‌ ئه‌ویش به‌تۆماركردنی 14 گۆڵ له‌مۆندیاله‌كاندا، به‌ڵام هێشتا رۆناڵدۆی به‌رازیلی به‌جیاوازیی گۆڵێك له‌پێش ئه‌و دوو یاریزانه‌وه‌ دێت.



خه‌ندان