لە دووەم یاری قۆناغی چوارگۆشەی زێڕینی خولی پاڵەوانەکانی ئەوروپا یارییە چاوەڕانکراوەکەی نێوان بروسیا دۆرتمۆندی ئەڵمانی و ریاڵ مەدریدی ئیسپانی لە خاكی ئەڵمانیا بەڕێوەچوو.

پاش ئەو شکستە گەورەیەی شەوێک پێش ئەوە توشی بەرشلۆنە هات لەسەر دەستی بایەرن میونشن، ئەمجارەیان ئەڵمانییەکی تر هەمان سیناریۆی بەسەر دووەم نوێنەری ئیسپانیا دوبارەکردەوە. ریاڵ مەدرید و بەرشلۆنە کە دوو لە زەبەلاحترین یانەکانی جیهانن لە دوو شەوی لەسەریەکدا بوونە قوربانی سیحری خاكی ئەڵمانیا و سەری وڵاتەکەیان شۆڕکرد.

لەگەڵ دەستپێکی یارییەکەدا هەست بەوەکرا بارودۆخەکە لە بەرژەوەندی ریاڵ مەدرید نیە تاوەکو ڕۆبێرتۆ لێڤاندۆڤێسکی هەرچەندە گومان هەبوو لە بەشداریکردنی لە خولەکی ٨ یەکەم گۆڵی تۆمارکرد. دوای ئەو گۆڵە ریاڵ نەیتوانی هاوسەنگی خۆی لەسەر یاریگا بەدەست بهێنێت بەڵام سودی لە هەڵەیەکی بەرگریکارانی دۆرتمۆند وەرگرت و کریستیانۆ ڕۆناڵدۆ ئەنجامەکەی یەکسانکردەوە. نیوەی یەکەم بەو ئەنجامە بەکۆتاهات.

لە نیوەی دووەمدا دۆرتمۆندی ریاڵی توشی شۆککرد کاتێک لێڤاندۆڤێسکی ئەستێرەی یارییەکە سێ گۆڵی لەسەریەکی لە خولەکی ٥٠ و ٥٥ و ٦٦ تۆمارکرد و هەمان سیناریۆی شەوی ڕابردووی دوبارەکردەوە کە بەرشلۆنە لە نیوەی دووەمدا سێ گۆڵی لێ تۆمارکرا و یارییەکەش هەر بەو ئەنجامە بەکۆتاهات.

بەم شێوەیە ریاڵ مەدرید پێویستە لە خاكی خۆی بە ئەنجامی ٣-٠ سەرکەوتن بەدەست بهێنێت ئەگەر بیەوێت بگاتە قۆناغی داهاتوو.