مانچستەر ٢-٢ چێڵسی: ستامفۆرد بریج دووبارەبوونەوەی یاری لوتکەی جامی ئینگلتەرا لەخۆدەگرێت
هەمیشە یارییەکانی نێوان شەیتانە سوورەکان و بلوز چێژی تایبەتی خۆی هەیە بەهۆی ئەو ململانێ بەهێزەی لە چەند ساڵی ڕابردوودا لەنێوان ئەو دوو یانەیەدا هەبووە و ئەمشەویش لە یارییەکەی بەهێزدا هەردوولا بە دوو گۆڵ بۆهەرلایەک بەرامبەربوون.
مانچستەر توانی بلوز توشی شۆک بکات پاش ئەوەی لە خولەکەکانی ٥ و ١٢ دوو گۆڵی لەسەریەکی لە ڕێگای هێرناندێز و ڕونی تۆمارکرد و نیوەی یەکەم بە سەرکەوتنی مان یونایتد بەکۆتاهات. بەڵام لە نیوەی دووەمدا چێلسی توانی گۆڕانکاری لە ئەنجامی یارییەکەدا بکات و ئێدین هەزارد لە خولەکی ٥٩ گۆڵێکی تۆمارکرد و جیاوازییەکەی کەمکردەوە، دواتر ڕامیرێزی بەڕازیلی لە خولەکی ٦٨ گۆڵی بەرامبەری تۆمارکرد و یارییەکەش هەر بەو ئەنجامە بەکۆتاهات.
بەمەش یاری دووبارەکردنەوە ئەنجام دەدرێت لە ستامفۆرد بریج بۆ یەکلاکردنەوەی براوەی ئەم قۆناغە.
