ڕاهێنەری یانەی مانچێستەر یونایتد سێر ئالێکس فێرگسۆن ڕایگەیاند کە تیمەکەی چانسێکی گەورەی هەیە بۆ بەدەست هێنانی نازناوی چامپیۆنزلیگ لەم وەرزە بەڵام تەنها ئەگەر بەرگریکارەکانی ئامادە بن.



یونایتد توانی لە هەردوو یاری یەکەمی خۆی لە ئەوروپا سەرکەوتن بەدەست بهێنێت بەسەر هەردوو یانەی کلوج و گاڵاتەسەڕای،بەڵام تا ئێستا چەند بەرگریکارێکی پێکاوی هەیە و ئەمەش کاریگەری هەبووە لەسەر ئاستی هێڵی دواوە تایبەت بە هۆی ئامادە نەبوونی هەرسێ یاریزان نیمانیا ڤیدیچ،کریس سمۆڵینگ و فیل جۆنز،فێرگسۆن لە لێدوانێکیدا بۆ ڕۆژنامەی دەیلی میڕۆر ووتی :

بەڕاستی شتێکی ناخۆشە کە لە چەند ساڵی ڕابردوو نازناوی چامپیۆنزلیگ ـمان نە بردۆتەوە،تایبەت ئەو ساڵانەی کە زۆر لێی نێزیک ببوینەوە،بەڵام هەرگیز نابێ دەست بەردار بیت چونکە ساڵێکی تر دێتەوە و جارێکی تر بەژداری تێدا دەکەیت،یاری کۆتایی ئەمساڵە لە وێمبلی دەبێت و ئەمەش پاڵنەرێکی بەهێزە بۆ ئێمە،ئەگەر بەرگریکارەکانم ئامادە بن ئەوا چانسێکی گەورەمان دەبێت بۆ بەدەست هێنانی ئەو نازناوە.