یانەی مانچستەر ستی ئینگلیزی ئاشكرای كرد ماریۆ بالۆتێلی هێرشبەری نەشتەرگەری لە چاویدا دەكات بۆ چارەسەركردنی كورت بینی و ئەوەش دەبێتە هۆی دووركەوتنەوەی ئەو یاریزانە بۆ ماوەی مانگێك و بەوەش بەشداری یاری یانەكەی بەرامبەر ریال مەدرید ناكات لە رۆژی 18ی ئەم مانگەدا.
ئەو یاریزانە سەرشێتە بەشداری هەردوو یاری هەڵبژاردەی ئیتاڵیا لە بەرامبەر بولگاریا و ماڵتا ناكات لە پاڵاوتنەكانی ئەوروپای سەركەوتن بۆ مۆندیالی 2014ی بەرازیل كە هەفتەی داهاتوو بەڕێوەدەچێت.
لە خولی ئینگلیزیش ئەو یاریزانە بەشداری یاری نێوان یانەكەی و یانەی ستۆك ستی ناكات و لە یاری دوێنێی یانەكەشدا بەرامبەر كوینز پارك رینجەرز بەشداری نەكرد.
ئەو یاریزانە لە شاری بریشیای ئیتاڵی نەشتەرگەرییەكەی دەكات و بۆ ماوەی 10 رۆژ پشوو دەدات بەرلەوەی بگەڕێتەوە شاری مانچستەر و هێواش هێواش دەست بە مەشقەكانی بكاتەوە.
مانچستەر ستی دوو لە كاریگەرترین هێرشبەرانی خۆی لە ماوەی داهاتوودا لە دەست دەدات كە بریتین لە سێرجیۆ ئەگوێرۆ كە تووشی پێكان هاتووە، لەگەڵ بالۆتێلی.