دوای ئەوەی ڕاهێنەری تازەی یانەی بەرشلۆنە تیتۆ ڤیلانۆڤا لەئەركەكەی دەست بەكاربوو، یانەی ناوبراو هەوڵ دەدات چەندین بۆندی تازە مۆر بكات بەتایبەتی لەهێڵی بەرگری، لەمباریەوە ڕۆژنامەی سپۆرتی ئیسپانی كە لەشاری بەرشلۆنە دەردەچێت ڕایگەیاند یانەكەی هەرێمی كەتالۆنیا دەیەوێ بۆندێك لەگەڵ یاریزانی هەڵبژاردەی ئەڵمانیا و یانەی بروسیا دۆرتمۆند ماتس هۆملیز مۆر بكات كە ئاستێكی بەرز لەگەڵ هەڵبژاردەی وڵاتەكەی پێشكەش دەكات لەیارییەكانی یۆرۆی 2012 لەهەردوو وڵاتی پۆلەندا و ئۆكرانیا.
یاریزان هۆملیز تەمەن 23 ساڵ لەسەرجەم یارییەكانی هەڵبژاردەی ناسیونال مانشافت توانایەكی یەكجار بەرزی نواندووە و ڕۆڵێكی سەرەكی هەبوو لەبەهێزكردنی هێلی بەرگری هەڵبژاردەكەی، ڕۆژنامەی سپۆرت ڕایگەیاند كە هۆملیز باشترین شوێنگرەوە دەبێت بۆ یاریزان كارلیس پیۆل ئەگەر پیۆل بڕیاری وازهێنان بدات، جگە لەوەش نرخی ئەو یاریزانە زۆر كەمتر دەبێت لەنرخی یاریزانی بەرازیلی تیاگۆ سیلڤا كە بەرشلۆنە چاوی لەسەر داناوە و یانەی میلان داوای 40 ملیۆن یۆرۆ دەكات یان یاریزانی یانەی ئەتلەتیك بیلباو خافی مارتینیز كە نرخەكەی 35 ملیۆن یۆرۆیە.
رۆژنامەكە ئەوەشی ڕاگەیاند كە ئاست بەرزی یاریزان هۆملیز سەرنجی چەندین یانەی گەورەی ئەوروپای بۆ خۆی ڕاكێشاوە وەك یانەكانی مانچستەر یونایتد و مانچستەر سیتی لەئینگلتەرا و یۆڤانتس و ڕۆما لەئیتالیا.