یەكێتی پایسكلسواری عێراق لەكۆبوونەوەی دەستەی گشتی، كە لەشاری دیوانیە بەڕێوەچوو چەندین بڕیاری گرنگیان دا وەكو دەستنیشانكردنی ڕاهێنەرانی هەڵبژاردەكانی عێراق بۆ پایسكلسواری لەسەر ئاستی كوڕان بۆ تازەپێگەیشتووان و لاوان و پێشكەوتووان و لەسەر ئاستی كچان، كە تیایدا لەسەر ئاستی تازەپێگەیشتووان ڕاهێنەری یانەی سۆلاڤ فەرمان رەحمان وەكو ڕاهێنەر دەستنیشانكرا و لەسەر ئاستی لاوان ڕاهێنەری یانەی هەولێر موسا موحسین وەكو یاریدەدەری ڕاهێنەر دەستنیشانكرا و لەسەر ئاستی پێكشەوتووان كەنعان ئیسماعیل وەكو یاریدەدەری ڕاهێنەر دەستنیشانكرا و لەسەر ئاستی كچان ڕاهێنەری یانەی هەولێر عەبدولقادر نورەدین وەكو ڕاهێنەری هەڵبژاردەكە دەستنیشانكرا.
لەلێدوانێكیدا موسا موحسین یاریدەدەری ڕاهێنەری هەڵبژاردەی لاوانی عێراق بۆ پایسكلسواری گوتی: یەكێتی پایسكلسواری عێراق بەفەرمی بڕیاری دا ڕاهێنەر عەلی حەمید وەكو ڕاهێنەری هەڵبژاردەی لاوان دەستنیشان بكرێت و منیش ببمە یاریدەدەری ڕاهێنەری هەڵبژاردەكە، هەست بەخۆشیەكی زۆر دەكەم، بۆ ئەم مەبستە وا بڕیارە دوای تەواوبوونی تاقیكردنەوەی نیوەی ساڵ-ی قوتابیان هەڵبژاردەی لاوانی عێراق ئۆردوگایەكی مەشقی لەشاری هەولێر ئەنجام بدات بەمەبەستی خۆئامادەكردنمان بۆ هەردوو پاڵەوانێتی وڵاتانی عەرەبی لەئیمارات و پاڵەوانێتی مازنداران لەوڵاتی ئێران، هەردوو پاڵەوانێتی لەمانگی سێ بەڕێوە دەچێت.
لەلایەكی دیكەوە ڕاهێنەری هەڵبژاردەی ئافرەتانی عێراق عەبدولقادر نورەدین لەلێدوانێكیدا گوتی: یەكێتی پایسكلسواری عێراق بەفەرمی ئەركی ڕاهێنەرایەتی هەڵبژاردەی عێراقی بەمن سپارد و ڕاهێنەر سیروان سامی وەكو یاریدەدەری ڕاهێنەر دەستنیشان كرا، كە ئەویش كوردە، وا بڕیارە دوای تەواوبوونی تاقیكردنەوەی نیوەی ساڵ دوو ئۆردوگای مەشقی لەشاری سلێمانی و هەولێر ئەنجام بدەین بەمەبەستی خۆئامادەكردنمان بۆ پاڵەوانێتی ئاسیا، كە مانگی داهاتوو لەوڵاتی مالیزیا بەڕێوە دەچێت و گشت یاریزانانی هەڵبژاردەكە كوردن.
جێگەی باسە چەندین یاریزانی كورد بانگهێشتی هەڵبژاردەكانی عێراق لەسەر ئاستی تازەپێگەیشتووان و لاوان و پێشكەوتووان و كچان كراون.