یەكێتی تۆپی دەستی كوردستان بەفەرمی بڕیاری دا لە25ی ئەم مانگە پاڵەوانێتی خولی پلەیەكی كوردستان بۆ تۆپی دەست لەسەر ئاستی كوڕان بە بەشداری كردنی 15 یانەی كوردستان لەشاری هەولێر بەڕێوە بچێت، كە بریتین لەیانەكانی (پێشمەرگەی هەولێر، كۆیە، شەقڵاوە، مەخمور، ئاڵا، سۆران، ڕواندز، چۆمان، گوڵان، ئاشتی، نەورۆز، ڕانیە، ڕزگاری، ئاكرێ، بەردەڕەش)، لەلێدوانێكدا بێجان ئیبراهیم سەرۆكی یەكێتی تۆپی دەستی كوردستان گوتی: وا بڕیارە لە25ی ئەم مانگە لەشاری هەولێر كۆبوونەوەی هونەری خولی پلە یەكەكانی كوردستان بۆ تۆپی دەست ئەنجام بدرێت و 26ی هەمان مانگ یارییەكان بەفەرمی دەست پێدەكات.
لەدرێژەی قسەكانیدا بێجان ئیبراهیم گوتی: لەخولی پلەیەكی كوردستان 15 یانە بەشداری تیادا كردووە بەسەر دوو كۆمەڵە دابەش دەكرێن، یەكەم و دووەمی هەردوو كۆمەڵە ڕاستەوخۆ سەردەكەون بۆ خولی نایابی كوردستان بۆ ئەم وەرزە، واتە لەخولی پلەیەكی كوردستان بۆ وەرزی ئەمساڵ چوار یانە بۆ خولی پلە نایابی كوردستان سەردەكەون و یەكەمی هەردوو كۆمەڵە ڕاستەوخۆ سەردەكەون بۆ یاری كۆتایی خولەكە. یارییەكانی ئەم خولە لەهەردوو هۆڵی شەهید فرەنسۆ هەریری لەشاری هەولێر و هۆڵی یانەی وەرزشی گوڵان لەبنەسڵاوە بەڕێوە دەچێت.
لەكۆتایی قسەكانیدا بێجان ئیبراهیم گوتی: بەسوپاسەوە بودجەی ئەم پاڵەوانێتیمان بۆ دابین كراوە و ئامادەكاریەكی باشمان كردووە و لەئاییندەیەكی نزیك دا خولی پلە نایابەكانی كوردستان بۆ كوڕان بە بەشداری 11 یانە دەست پێدەكات.