ئەوەی لە پێشكەوتنی جیهانی دیجیتالی نوێدا زیانی زۆری پێكەوت و دەكرێ بڵێین خەریكە بە یەكجاری نەمێنێ، تاقیگەی شووشتنەوەی وێنە بوو، پێشكەوتنی دیجیتالی چاپ كردنی وێنەی لەسەر كاغەز نەهێشت، بۆیە لەو بڕوایەدان كە نەوەی داهاتوو نەوەیەكی بێ ئەلبۆم دەبێت، بە نەمانی تاقیگە گەورەكانی شووشتنەوەی فیلم، پرینتەری زۆر بچووكی تایبەت بە چاپ كردنی وێنە بازاڕیان گەرم بوو، پرینتەرەكان شێواز و قەبارەیان جۆراوجۆرە.
نوێترین پرینتەری تایبەت بە وێنە پرینتەرێكە كە لەلایەن كۆمپانیای ئێل جی بەرهەم هاتووە، پرینتەری جۆری Pocket Photo PD261 ناسراوە، بچووكترە لە مۆبایلێكی ئاسایی. بارستاییەكەی تەنیا 22 ملمە. بۆ كاركردن بەو پرینتەرە پێویست بە كێبڵ ناكا. چونكە بەبێ وایەر بە مۆبایل پەیوەند دەدرێ خاڵی جێگای سەرنج لەو پرینتەردا پێویستی بەحیبر یا (كارتریج) نییە، بەڵكو ئەو وەرەقانەی كە وێنەكانی لەسەر چاپ دەبن تایبەتن.