كەسانی خاوەن پێداویستیی تایبەت، ئەوانەی كە بەشێكی جەستیان نییە، یان وەك مرۆڤی ئاسایی ناتوانن كاری رۆژانەیان ئەنجام بدەن، نابێ هیچ كاتێك جیاوازییان لەگەڵ كەسانی دیكەدا بكرێت، چونكە ئەوانیش خاوەن بیرۆكە و كار و پرۆژەن، هەندێكیان هێندە بەهرەمەندن تەنانەت لە مرۆڤێكی ئاسایی چالاكی زیاتر ئەنجام دەدەن، لە كوردستانیش گرنگی بە ژیان و بەهرەی كەسانی خاوەن پێداویستیی تایبەت دەدرێت، دواجار نمایشی جلوبەرگ لە شاری سلێمانی لەژێر ناوی (هەرگیز) بەڕێوەچوو، لەو نمایشەدا زیاتر لە (30) كەسی خاوەن پێداویستی تایبەت بە جلوبەرگ و نمایشە جوانەكانیان بەشداربوون و توانیان دڵی ئامادەبووان بۆ خۆیان راكێشن، ئەو بەشداریكردنەش بەبێ جیاوازی لە رەگەز و تەمەن و شێوەی خاوەن پێداویستیی تایبەتدا ئەنجامدرا، كە بە جلوبەرگی كوردی و بیانییەوە توانییان نمایشەكە بڕازێننەوە، لە هەمان كاتتدا و لە شاری نیۆیۆركی ئەمریكاش نمایشی جلوبەرگ بۆ كەسانی خاوەن پێداویستیی تایبەت لەلایەن رێكخراوی (Runway of Dreams) بەڕێوەچوو، لەو نمایشەدا چەندین جلوبەرگی ماركە بەناوبانگەكانی جیهان وەك (تۆمی هیڵڤیگر و تارگێت و دریمز) لەلایەن كەسانی خاوەن پێداویستی تایبەتەوە نمایشكرا.