لەگەڵ هاتنی وەرزی زستانەدا، گۆڕانكاری بەسەر شێوەی مۆدەكانی رەنگ و شێوەی ماكیاژدا دێت، كە پێشووتر زیاتر رەنگی هێمن و نەرم لە روخسار بەكاردەهێنران، بەڵام لە مۆدی داهاتووی ساڵی تازەدا، گۆڕانكاری زیاتر لە ماكیاژدا دێتەكایەوە، بەتایبەت لە رووی مۆدو شێوازەوە، بەهۆی ئەوەی ساڵی داهاتوو بە لوتكەی مۆدی ماكیاژ دادەنرێت، لەئێستاوە چەند مۆدێك دانراون و لەساڵی داهاتوودا لەسەر روخساری خانمان دەبینرێن كە ئەوانەن:
ماكیاژی سموكی چاو: ئەو مۆدەیە كە بە چاوی پشیلە ناسراوە، زیاتر رەنگی تۆخ بەكاردەهێنرێت، هەروەها لەگەڵ تێكەڵكردنی رەنگەكانی پرتەقاڵی و سەوز بەكاردێت، لەلایەكی دیكەشەوە ماكیاژی چاوی پشیلە، مۆدێكی پایەبەرز دەبێت و بەدانانی هێلەكانی چاوی باریك و ئەستوور، كە ئەوەش بە ئایلاینەر ئەنجام دەدرێت، لەبیریش مەكەن كە مۆدی ئایلاینەری شین و سەوز مۆدێكی پڕ سەرنجی چاوەكان دەبێت.
رەنگی تاریك و تۆخ بۆ لێوی پڕ: مۆدێكی باوی ماكیاژی ساڵی داهاتوو دەبێـت، بەتایبەت بۆ لێو، كە لەمۆدی كلاسیك دوور دەبێت، رەنگە تۆخەكانیش رۆڵی خۆیان دەبینن، بەتایبەت رەنگی تاریك وەك: رەنگی فراولە، وەنەوشەیی، رەنگی شیكۆڵاتە، رەنگی رەساسی تۆخ، هەموو ئەوانە لێو بە پڕی و تۆخی نیشان دەدەن و مۆدێكی باویش دەبێت لە داهاتوودا.
رەنگی رووناكیی پشت چاو: شێوازێكی دیكەی ماكیاژە لە ساڵی نوێدا، كە زیاتر پشت چاوەكان بە رەنگی رووناك و كراوە دەڕازێننەوە، مەرجە ئەو رەنگانە بریقەدارو رووناك بن، تا گۆڕانكاری بكرێت لەشێوەی پێشوودا كە زیاتر رەنگی تاریك بۆ پشت چاوەكان بەكاردەهێنران.
برۆی پان و كراوە: شێوازێكی سەرنجڕاكێشی جوانیی برۆ دەبێت، كە مۆدی برۆی پان و ئەستوور باو دەبێ، ئەگەرچی ئەو مۆدە لەساڵی (2016)شدا باو بوو، بەڵام پێشبینی دەكرێت ئەو شێوازە لە ساڵی تازەشدا لووتكەی مۆدی برۆ بگرێت.
برژانگی پڕو زۆر: گرنگە برۆت پان و ئەستوورو پڕ بێت، هەروەها برژانگەكانت درێژو پڕاوپڕ بێت، بۆیە ئەویش دەبێتە مۆدی سەرەكی بۆ ماكیاژی ساڵی داهاتوو.