لە وەرزی سەرماو سۆڵەشدا، گەشت و سەردانی خۆش دەكرێ، ئیدی ئافرەتان چ لەگەڵ ئەندامانی خێزان، یان لەگەڵ دەستە خوشك و هاوڕێیانی خۆیان، سەردانی شوێن و ماڵ و گەشتیش بۆ شوێنی دوورو نزیك دەكەن، گرنگە لە گەشتەكەتدا هەموو ئامادەكارییەكت كردبێت، بەتایبەت جلوبەرگ، چونكە پێویستییەكی سەرەكیی گەشتەكەت دەبێت، دەبێ جلەكەت وەكو گەشتیار، یان سەردانكار بێت، نەوەك جلێك بێت پێچەوانەی گەشت و سەردان. ئەو مۆدانەی لە گەشت و سەردانیدا باون بریتین لە:
- دەتوانی كراسێكی عەزییە، یان فوستانێك هەڵبژێریت، لەگەڵ ملپێچ و ملبەندێك بێت، هەروەها لەگەڵ پێلاوێكی بەرز، یان وەرزشی، سووراوی پەمەیی كاڵیش بەكار بهێنی.
- پانتۆڵی قوماش، یان پەموو، مۆدێكی دیكەی گەشتە، دەكرێت وەك مۆدی سەرەكی هەڵیانبژێریت و دەتوانی ئەو جلە بۆ گەشتی فەرمی و سەردانی شوێنی تایبەتیش لەبەر بكەیت.
- ئەوانەی حەز بە جلی هێڵكار و قەڵەمی دەكەن، دەتوانن قەمیسێكی هێڵدار و موقەللەم، لەگەڵ پانتۆڵێكی وەرزشی و چاكیتێكی كورت لەبەر بكەن، سووراوی سوور و پەمەیی تۆخیش بەكاربێنن.
- جینز، بۆ هەموو كاتێكی گەشت وسەردانە، هەمیشە بە جینز لە وەرزی سەرمادا توندوتۆڵ دەردەكەویت و لەسەرما و سۆڵەش پارێزراو دەبیت.
- دەتوانی چاكەتێكی پێست، یان فەروو و ئەستوور لەبەر بكەیت، لەگەڵ تیشێرت و قەمیس، هەروەها لەگەڵ پانتۆڵێكی تەسك، مۆدێكی نایابی لێی دەردەچێت.
- پانتۆڵی كراوە، لەگەڵ چاكەتێكی ناسك و تەسك و مل بەرز و گەورە، لەگەڵ جانتایەكی دەست و سووراوی بە رەنگی گوڵ و تووت، شێوازێكی نایابی دەبێت.