هەندێ لە خانمان گلەیی ئەوە دەكەن، كە چاكترین دەرمان و تاخمە ماكیاژ و هەنگاوەكانی جوانی بەكاردەهێنن، بەڵام هەست ناكەن سوودێكی تەواویان لە هەنگاوەكانیان بینیوە، هەست بەوەش دەكەن كە جوانیان بەو پێیە نییە كە مەبەستیانە، وێڕای ئەوەی كە خزمەتێكی زۆری جوانیان دەكەن، بەڵام ئایا بیریان لەوە كردۆتەوە كە هۆكارێكی گرنگ هەیە تا جوانتریان بكات، ئەو هۆكارەش خەوێكی باش و تەندرووستە، ئەو سوودانەی لە خەوێكی باشدا هەیە هاوتای چەندین هەنگاوی جوانییە، با لێرەوە بزانین خانمان چۆن دەخەون و خەوێكی باشیش چ سوودێكی بۆ جوانی خانمان و كچان هەیە :
- خەوتنێكی باش بۆ خانمان، پێویستە لە نێوان (7 – ???? كاتژمێر بێت، بە تایبەت خەوی شەوان، كە گرنگی زۆر زیاترە لە خەوی رۆژ، چاكتریشە ئەگەر خانمان شەوانە زوو بخەون و بەیانیانیش زوو هەڵبستن، چونكە ئەوە سوودێكی گرنگی هەیە بۆ پاكی و سافی پێست و تەندرووستی خانەكانی رووخسار.
- خەوتن، وا لە جەستە دەكات، كە خانەكانی پێست چالاكتر و ئەكتیڤ بن، بە تایبەت كاتێك برین و وردە خاڵ و پەڵە هەبێ، ئەوە بەرگری خانەكان وا لە گرفتانە دەكەن كە بەرەو نەمان بچن و نەمێنن.
- ئەگەر شەوانە خەوێكی باشت بە دەست هێنابێ، بەیانیان چاوەكان گەش و جوان دەبن، تەنانەت سپێتی چاوەكانت لە دوورەوە دەردەكەون، پێچەوانەی كەم خەوی، كە چاوەكانت سوور دەبێتەوە و ماكیاژەكەشت ئەوەندە كاریگەری نابێت لە جوانی چاوت.
- خەوی باش و تەندرووست، ژێرەوەی چاوەكانت لە ئەستووربوون و رەش بوون دەپارێزێت، پشتە چاویشت پڕ و گونجاو دەبێت، بەڵام ئەگەر خەوت كەم بێ، پشتە چاوت چرچ و لۆچی پێوە دیار دەبێت و ئیدی جوانی چاوەكانت نەشیاو دەبێ. هەوڵدە شەوانە بەر لە خەوتن، بڕێكی زۆر ئاو بخۆیتەوە و بەیانیانیش شەربەتی سرووشتی نۆش بكەیت، لە بیریش نەكەیت كە ددانەكانت بشۆیت تا دەمت پاك و بۆن خۆش بێت.
- لە خواردنی چەور و بەهێز دوور بكەوە و هەوڵدە شەوانە خواردنێكی گونجاو بخۆیت، چاكتریشە میوە و سەوزەی لەگەڵ بێت، چونكە خواردنی بەهێز بەر لە خەوتن، پێستی رووخسارت تووشی زیپكە و پەڵە و چرچ و لۆچی دەكات.
- وا چاكە شێوازی نووستنت شیاو بێ، لە شوێنێكی بێدەنگ و دوور لە رووناكی بێت، تەنانەت هەوڵدە روخسارت بە سەرین نەكەوێ، چاكترە پشتەسەرت لەسەر سەرین بێت، یان دەم و چاوت لەسەر دەستت دانێ و دەستت بخە ژێر سەرت و بخەوە، چونكە هەندێ جار سەرین و پێخەفی خەو پێستت تووشی گرفت دەكەن.
- شەوانە بەر لە نووستن، گەرماوێك بكە و چاكتریشە بە ئاوی شلەتێن خۆت بشۆیت، پاشان مەهێڵە هیچ ماكیاژ بە روخسارت بمێنێتەوە و كرێمی شەوانەش بۆ پێستت بەكاربهێنە.