پێست رواڵەت و سیمای كەسایەتی هەر مرۆڤێك پیشان دەدات، كاتێك تیشكی بە تینی هەتاو بەر پێستی خانمان دەكەوێ، یاخود خانمان بۆ خۆیان گیراوەی جۆراوجۆر لە پێستیان دەدەن، ئەگەری زۆر هەیە پێستیان تووشی شێوان ببێت. خەونی هەموو كچێكە كە پێستی هەردەم ناسك بێ، پێست چەند چەشنێكی هەیە، لەوانە: پێستی وشك، پێستی سادە، پێستی چەور، پێستی هەستیار، بەڵام باوترینیان ئەوانەن، بۆیە وا چاكە خانمان بزانن پێستیان چ جۆرێكە، تا بتوانن چ جۆرە كرێم و پێداویستی بەكار بهێنن. خانمان دەتوانن بۆ نەرم كردنی پێستیان گرنگی بەوانە بدەن، رۆژانە خواردنەوەی بڕە ئاوێكی زۆر، میوە و سەوزەی زۆر، كرێمی دژە خۆر بەكار بهێنن، لەو كاتەی دەچنە دەرەوە.
ئەم هەنگاوانەی دادێ پێستت نەرم و نیان و جوان دەكەن:
-هەنگاوی رۆژانە:
هەموو شەوێك بەر لە نووستن، دەم و چاوت بشۆ، یان ئەو شوێنانەی هەستی پێ دەكەی تووشی شێواوی هاتوون، وا باشە دوای پاك كردنەوەی دەم و چاو كرێمی نەرم كردنەوەی لێ بدەی، لە بیریش مەكە كە ئەگەر ماكیاژی پێوە بوو، دەبێ بەر لە نووستن لێی بكەیتەوە.
- ماسكی هەفتانە:
هەوڵ بدە هەفتەی جارێك ماسكێك بۆ پێستت بكەی، بە تایبەت پێستی دەم و چاو، چاكترین ماسك بۆ پێست، بریتییە لە وردە گەنمەشامی، تێكەڵ بە هەنگوین بكرێ پاشان لە پێستی خۆتی بسووە، ئەگەر ویستت پێستت سپی بێ، دەتوانی هەندێك خومرە تێكەڵ بەو گیراوەیە بكەی.
- شێلانی پێست:
رۆژانە هەوڵ بدە بۆ ماوەی (5) تا (10) خولەك، پێستت بشێلە، ئەوەش بە دانانی دوو پەنجەی دەست لە سەر ئەو شوێنەی مەبەستتە بیشێلی، بەڵام دەبێ جووڵەی شێلانەكە بە بازنەیی بێ.
- پێستت بە ئاوی شلەتێن بشۆ:
چونكە ئاوی گەرم یان زۆر سارد كاریگەریی خراپ دەخاتە سەر پێستت، ئەگەر لە هاوین یان لە زستاندا بووی، با ئەو ئاوەی دەست و دەم و چاوتی پێ دەشۆی، نە گەرم و نە سارد بێت.