ژمارەیەک لە هاووڵاتیانی رووسیا لە دەریاچەی بایکاڵی وڵاتەکەیان، کە پلەی گەرما تێیدا بۆ نزیکەی 35 پلەی ژێر سفری سەدی دابەزیوە، پێشوازی لە ساڵی 2021 دەکەن و بۆ ماوەی چەندین خوولەک لەناو ئاوەکەدا دەمێننەوە.

چوون بۆ کەنارەکانی دەریاچەی بایکاڵ و مەلەکردن تێیدا یەکێکە لەو شتانەی هەموو ساڵێک ئەم کۆمەڵە هاوڕێیە لە رۆژی 31ی کانوونی یەکەمدا ئەنجامی دەدەن. ئەندرێ بوگای، هاووڵاتیی رووسیا دەڵێت "هەموو ساڵێک من و هاوڕێکانم لە 31ی کانوونی یەکەمدا دێینە کەناری بایکاڵ. ئێمە رادەکەین و مەلە دەکەین. لەڕێگەی مەلەکردنەوە پیرۆزبایی ساڵی نوێ لەیەکدی دەکەین. ماوەی چەندین ساڵە بەمجۆرە دەکەین. بەم کارەمان ژیانێکی تەندروستتر بۆ خۆمان فەراهەم دەکەین".

دەرەوەی دەریاچەکە بەفرە و بەستوویەتی، بەڵام هێشتاش ژمارەیەک لەوانەی لە ئاوە ساردەکە دێنە دەرەوە، بە پێ خاوسی دەسوڕێنەوە.
ئەوان پێیانوایە، ئەم کەشوهەوا ساردە بۆ باری تەندروستی و جەستەیان پێویستە.

سێنیا نۆڤۆسێڵسیڤا، هاووڵاتیی رووسی گوتی "وا هەستدەکەین کە 10 ساڵ گەنجتر بووینەتەوە. گەنجتر، جوانتر و تەندروستتر دەبین".

دەریاچەی بایکاڵ دەکەوێتە باشووری سیبیریا لە رووسیا و بە گەورەترین دەریاچەی ئاوی شیرین لە جیهاندا دادەنرێت، کە نزیکەی 22% تاوەکو 23%ی هەموو ئاوی شیرینی جیهان لەخۆدەگرێت.

دوای مەلەکردنەکە، هاووڵاتییەکان لە کەشە ساردەکە و هەندێکیان بەبێ هەبوونی جلوبەرگێکی ئەوتۆ لەبەریاندا بەناو دارستانەکەدا رادەکەن بۆئەوەی وەرزشەکەیان تەواوبکەن.
rudaw -